काठमाडौं, ११ जेठ । लकडाउनकै बीचमा ऐतिहासिक तथा पुरातात्विक महत्वको रानीपोखारीको पुनर्निर्माणको काम धमाधम चलिरहेको छ । कामदारलाई कार्यस्थलसम्म ल्याउन समस्या हुँदा पहिलेको तिव्र गतिमा काम भने भएको छैन । तर, अबको करिब २ हप्ताभित्र मन्दिरबाहेक पोखरी पुनर्निर्माणको काम सकाउने लक्ष्य रहेको राष्ट्रिय पुनर्निर्माण प्राधिकरणले बताएको छ । त्यसपछि रानीपोखरीमा पानी भर्ने काम सुरु हुने प्राधिकरणका पुरातत्व हेर्ने इन्जिनियर राजुमान मानन्धरले जानकारी बताउनुभयो । ‘१० दिनभित्र पोखरीको काम सकाएर त्यसलगत्तै पानी भर्न सुरु गर्छौं,’ उहाले भन्नुभयो ’पोखरीको उत्तरतर्फको गारोमा केही काम छ, भक्तपुरबाट कामदार ल्याएर काम गर्न गारो भएकाले कीर्तिपुरबाट ल्याएर काम गराउन लागेका छौं ।’

रानीपोखरीमा पानी नअडिने सम्भावना देखेर पुनर्निर्माण प्राधिकरणले पोखरीको गारो र पिँधमा कालो माटो राखेर त्यसमाथि इँटा बिछ्याएको छ । भक्तपुरको कालोमाटो राखेर पोखरी पुनर्निर्माण गरिएकाले पोखरीमा हालिने पानी नचुहिने विश्वास गरिएको छ । अब मन्दिर निर्माण अघि बढाउँदै पोखरीमा पानी राखेर चुहिनेरनचुहिने परीक्षण गरिनेछ । पोखरीमा पानी भर्न दुईवटा बोरिङ निर्माण भइसकेको छ । अहिले मन्दिरसम्म जाने पुल पुनर्निर्माणको काम अन्तिम चरणमा पुगेको छ । पोखरीको बीचमा रहेको बालगोपालेश्वर मन्दिरको काम भने भर्खर दुई तलाको मात्रै सकिएको छ ।

फोटो धुव्र अधिकारी