टोकियो, १ जेठ । जापानमा कार्यरत नेपाली चिकित्सकहरुले कोभिड–१९ का कारण त्रासमा नबस्न नेपाली समुदायलाई आग्रह गरेका छन् । बुधबार राजदुताबास टोकियोको आयोजना र एनआरएनए जापानको संयोजनमा भएको अनलाईन पत्रकार सम्मेलनमा बोल्दै नेपाली चिकित्सकहरुले त्रासमा नबसी सतर्कता अपनाउन सुझाब दिएका हुन ।

उनीहरुले जापानमा कोरोना संक्रमितको संङख्या बढेपनि मृत्युको संङख्या कम रहेकोले सुरक्षित रहन आग्रह गरे । कोभिड–१९ का कारण जापानमा अहिले सम्म १६ हजार बढी संक्रमीत भएका छन भने ६ सय ५७ जनाको मृत्यु भएको छ । मृत्यु भएका मध्ये अधिकांश ५० वर्ष माथीका रहेकोले नेपाली समुदाय आत्तिहाल्ने अवस्था नरहेको नागोया सेन्ट्रल हस्पिटलमा कार्यरत न्युरो सर्जन डा। लुसुन चालिसेले बताउनुभयो । उहाँले जापानमा रहेका नेपालीहरु युवा भएकोले संक्रमित भईहाले पनि छिटै निको हुने विश्वास व्यक्त गर्नुभयो । जापानमा अहिलेसम्म ७ जना नेपालीमा कोरोना संकंमित पुष्टी भएको छ । जसमा ३ जना निको भई घर फर्किसकेका छन् ।

त्यस्तै अर्का डा. सन्दिप शाक्य र ससीम पौडेलले सामाजिक दुरी कायम गर्न सके कोरोनाको संक्रमणबाट बच्न सकिने बताउनुभयो । उहाँहरुले ३ वटा ब लाई पालना गर्न पनि आग्रह गर्नुभयो । ३ वटा ब जस्तै बन्द कोठामा नबस्ने, बढी भिडभाडमा नजाने र बढी नजिकको सम्बन्ध नराख्ने गर्दा पनि कोरोनाको संक्रमण नहुने प्रष्ट पार्नुभयो । कार्यक्रमको सम्बोधन गर्दै जापानका लागि नेपाली राजदुत प्रतिभा राणाले सुरक्षित रहन सबै नेपालीलाई अपिल गर्नुभयो ।

एनआरएनए जापानका अध्यक्ष देविलाल भण्डारीले कोरोनाको विपतलाई सबैले मिलेर सामना गर्नुपर्ने बताउनुभयो । एनआरएनए जापानका महासचिव जनक विक्रम शाहीले सहजीकरण गर्नुभएको कार्यक्रममा पत्रकारले आ(आफना जिज्ञासा राखेका थिए ।