काठमाडौं, २९ चैत । कोरोना भाइरसको संक्रमण र मृत्यु दुवै हिसाबले सबैभन्दा बढी प्रभावित देशमा अमेरिका अगाडि आएको छ। पछिल्लो तथ्यांकअनुसार अमेरिकामा पाँच लाख ७ हजार ७ सय ८० संक्रमित छन् भने १९ हजार ८ सय १६ जनाको मृत्यु भएको छ । वितेको १२ घन्टामा १ हजार ६९ जनाको ज्यान गएको छ ।

यसअघि बढी मृत्यु हुनेमा इटाली अगाडि थियो। इटालीमा १८ हजार ८ सय ४९ जनाको ज्यान गएको छ। इटालीमा एक लाख ४७ हजार पाँच सय ७७ जना संक्रमित छन्।

अमेरिकामा संक्रमितमध्ये २८ हजारमात्र निको भएका छन्। हालसम्म स्पेनमा १६ हजार ४ सय ६८ र फ्रान्समा १३ हजार एक सय ९७ जनाको ज्यान गएको छ। बेलायतमा पनि ९ हजार ८ सय ७५ जनाको मृत्यु भएको छ।

विश्वभर हालसम्म १७ लाख ३३ हजार ९४५भन्दा बढी संक्रमित भएका छन् भने करिब एक लाख ६ हजार ५१८ जनाको मृत्यु भएको छ। त्यस्तै विश्वभर ५० हजार २७१ जनाको स्वास्थ्य अवस्था गम्भीर रहेको छ ।

कोरोनाबाट अमेरिकाको एउटै शहर विश्वका अरु देशभन्दा बढी प्रभावित बनेको छ । अमेरिकामा न्युयोर्क सबैभन्दा बढी प्रभावित छ। न्युयोर्कमा एक लाख ७२ हजार ३ सय ५८ जना संक्रमित छन् भने ७ हजार ८ सय ४४ जनाको ज्यान गएको छ। न्युयोर्कमा जति संक्रमण विश्वका अरु कुनैपनि देशमा भएको छैन। स्पेनमा एक लाख ६१ हजार ८ सय ५२ जना संक्रमित छन् भने फ्रान्समा एक लाख २४ हजार ८ सय ६९ र जर्मनीमा एक लाख २२ हजार ८ सय ५५ जना संक्रमित छन्।