बुटवल, २२ चैत्र । भारतीय तरकारी र फलफुलको ठूलो मात्रामा खरिद बिक्री गर्ने बुटवल कृषि थोक बजार केन्द्र अन्तत बुटवल उपमहानगर पालिकाले बन्द गर्ने निर्णय गरेको छ । एबिसी न्युजले भारतीय तरकारी र फलफुलका गाडीले कोरोना भाईरस भित्राउन सक्ने भन्दै गरेको लगातारको बिषय उठान र सामाजिक सञ्जालहरुमा आएको ब्यापक गुनासो आएपछि उप महानगरले मापदण्डअनुसार किनमेल नभएको बहाना बनाउंदै केन्द्र बन्द गर्न निर्देशन दिएको छ । संघिय सरकारसंग मात्र रहेको भारतीय तरकारी रोक्ने अधिकार स्थानीय सरकारले प्रयोग गर्न नपाउने भएपछि मापदण्डको नाम दिएर बन्द गराईएको उपमहानगर श्रोतले बताएको छ । स्थानीय नागरिकहरुबाट समाजिक दुरी कायम नगरेको तथा अनावश्यक भिडभाड बढी बएको भन्ने गुनासो आएपछि उपमहानगरपालिकाले बुटवल कृषि थोक बजार केन्द्र बन्द गर्ने निर्देशन दिएको उपमहानगरले जनाएको छ ।
हरियो साग सब्जि तरकारिको सुरक्षित कारोवार गर्ने भन्दै खुला राखिएकोमा हाल उक्त कारोवारमा बढि भिडभाड गरि कारोवार भइरहेकाले बन्द गर्नुपरेको उपमहानगरपालिका प्रमुख शिवराज सुवेदीले बताउनुभयो ।
उपमहानगरपालिकाले सामाजिक दुरि कायम गराउन गरेको पटकपटकको आग्रहसमेत अटेरी गरेकाले चैत २५ गतेसम्मका लागि केन्द्र बन्द गर्न निर्देशन दिइएको प्रमुख सुवेदीले बताउनुभयो । सटरहरु बन्द गर्ने निर्णय गरिएपनि स्थानीय किसानहरुलाई चोकहरुमा भने सामाजिक दुरी कायम राख्दै ताजा तथा हरियो तरकारी बेचबिखन गर्ने व्यवस्था मिलाइएको प्रमुख प्रशासकीय अधिकृत चक्रपाणी शर्माले जानकारी दिनुभयो ।
विभिन्न चोकहरुमा स्थानीय उत्पादनका हरियो सागपात र तरकारिको बेचबिखनमा सामाजिक दुरी कायम भए नभएको अनुगमन गर्न कृषि विकास शाखा प्रमुख सन्तोष जिसीलाई जिम्मेवारी दिइएको समेत बुटवल उपमहानगरले जनाएको छ । उक्त केन्द्रमा दैनिक करिव ७००/८०० जना ब्यापारीको जमघट हुने गरेको पाइएपछि उपमहानगरले बन्द गराएको हो । केन्द्रमा धेरैजसो छिमेकि मुलुक भारतबाट तरकारी आउने गर्छ ।
बुटवलले यसअघि नै बाहिरबाट आउने सबैखाले तरकारी र सामनमा रोक लगाएपनि भारतबाट आउने तरकारी र फलफुलहरु रोक्न सकेको थिएन। विभिन्न सिमा नाकाबाट लुकिछिपी सामन ल्याउने र भिड जम्मा गर्न थालेपछि उपमहानगरपालिकाले तत्कालै बन्द गराएको हो । स्थान तोकेर स्थानीय उत्पादनका हरियो तरकारी सुरक्षित रुपमा सामाजिक दुरी कायम गरेर बेचबिखनको व्यवस्था मिलाइएको उपमहानगरले प्रवक्ता रामप्रसाद रेग्मीले बताउनुभयो । उहाँले स्थानीय उत्पादन भएनभएको समेत अनुगमन हुने बताउनुभयो ।
एबिसी न्युजले भारतीय तरकारी र फलफुलका कारण कोरोना जोखिम बढेको बिषयमा यस अघि पटक पटक खबरदारी गरेको थियो ।