नेपालगन्ज, ११ माघ ।
नेपालगञ्ज उद्योग बाणिज्य संघको नयाँ नेतृत्व चयनका लागि निर्वाचन सम्पन्न भएको छ । शनिबार नेपालगञ्जस्थित भेरी प्राविधिक शिक्षालयमा नयाँ नेतृत्वको लागि मतदान भएको हो ।
साँझ ५ बजे सम्पन्न मतदानमा ९१ प्रतिशत मत खसेको संघका अध्यक्ष नन्दलाल वैश्यले जानकारी दिनुभयो । कुल ३ हजार ५० मतदातामध्ये २ हजार ७ सय ९० मत खसेको थियो ।
मतदान केन्द्रमा सहजताका लागि १२ वटा बुथमा मत खल्सान सक्ने व्यवस्था मिलाइएको थियो । चुनावी मैदानमा साझा प्रजातान्त्रिक उद्योगी व्यवसायी समुहका तर्फबाट अध्यक्षमा ललित रौनियार र समावेशी प्यानलबाट तर्फबाट अध्यक्षमा अब्दुल वाहिद मन्सुरी ‘चुन्ना’ रहेका छन् ।
मतपेटिकाहरु मतदान स्थल भेरी प्राविधिक शिक्षालयमा नै कडा सुरक्षा घेरामा राखिएको छ । निर्वाचन कमिटीका अनुसार आइतबार बिहान ९ बजेबाट सोही ठाउँमा मतगणना सुरु हुने बताइएको छ ।
शनिबार मतदान शान्तिपुर्ण रुपमा सम्पन्न भएको वडा प्रहरी कार्यालय नेपालगञ्जका इन्चार्ज प्रहरी निरीक्षक हरी बस्नेतले जानकारी दिनुभयो । मतदान स्थलमा सुरक्षाको लागि ठुलो मात्रामा नेपाल प्रहरी र शसस्त्र प्रहरी परिचालन गरिएको थियो ।