काठमाडौं, ३ पुस । प्रधानमन्त्री केपी शर्मा ओली र प्रमुख प्रतिपक्षी दल नेपाली कांग्रेसका सभापति शेरबहादुर देउवाबीच भेटवार्ता भएको छ ।

प्रधानमन्त्री ओलीलाई भेट्न कांग्रेस सभापति देउवा नेता रमेश लेखकलाई लिएर बिहीबार विहान बालुवाटार पुग्नु भएको थियो । उहाले संवैधानिक परिषदसम्बन्धी विवादास्पद विधेयक नल्याउन आग्रह गर्नुभएको छ। केन्द्रीय समिति बैठकले गरेको निर्णयअनुसार प्रधानमन्त्रीको ध्यानाकर्षण गराएको नेता लेखकले बताउनुभयो ।

सरकारले संवैधानिक परिषदसम्बन्धी कार्यविधिलाई परिवर्तन गर्न खोजेको भन्दै कांग्रेसले आपत्ति जनाएको थियो । प्रमुख एवं पदाधिकारी नियुक्ति एकलौटी ढंगले गर्न मिल्ने गरी गरिने परिवर्तन स्वीकार्य नहुने कांग्रेसले बताएको छ ।भेटमा पूर्व प्रधानमन्त्री समेत रहेका देउवाले प्रधानमन्त्री ओलीको स्वास्थ्य अवस्थाबारे चासो ब्यक्त गर्नुभएको थियो ।