टोकियो, जापान । जापान पछिल्लो समय नेपाली कलाकारको पहिलो रोजाई बनेको छ । ८८ हजार नेपाली रहेको जापानमा बिभिन्न समयमा कार्यक्रम समेत आयोजना हुन्छन् ।

चाहे त्यो तीज फेष्टिबलको नाममा होस् त अन्य सांस्कृतीक साँझ, डम्फु साँझ, अवार्ड, ल्होसार त कतै धमाकाकै नाममा । कलाकारको जम्बो टोली नै जापान आउने गर्छन् ।  नेपालीलाई सांङगितीक माध्यमबाट भरपुर्ण मनोरन्जन दिदै आएका छन् । आयोजकले बोलाएपछि भीषा सजिलै पाउने हुदा जापान आउन सजिलो भएको हो ।

व्यस्तताका कारण प्रवासमा हुने नेपालीले संस्कृती नै बिर्सने हुन की भन्ने चिन्ता पनि कलाकारमा छ । नेपालको संस्कृती र संस्कार प्रवासमा जन्मने नयाँ पुस्तालाई थाहा नहुने हुदा हस्तान्तरण गर्ने जिम्वेवारी समेत आफ्नो भएको कलाकारको भनाई छ । नेपाली महिलाहरुको महान पर्व हरितालिका तीजमा जापानमा धेरै कार्यक्रम आयोजना भए ।

ती कार्यक्रममा नेपालका चर्चित कलाकारहरु पशुपति शर्मा, बद्री पंगेनी, खुमन अधिकारी, मन्जु पौडेल, रमेशराज भट्टराई सम्झना भण्डारी, प्रताप दास लगायतका अन्य कलाकार पनि जापान आए । राष्टिय ख्याती कमाएका तर रोजगारिका शिलशिलामा जापान रहेका लोकप्रिय गाएक सुर्य खड्का , गाएक अमित सापकोटा, खेमराज पौडेल, चेतन घर्तिमगर र भावना आचार्य पनि बिभिन्न ठाउँमा सहभागी भए र दर्शकलाई मनोरन्जन दिए ।  जापानको तीजलाई साच्चिकै तीज बनाए ।

सबै नेपालीलाई समेटने गरि आईतबार हाम्रो परम्परा हाम्रो संस्कृती, भन्ने नाराका साथ टोकियोको सिवा पार्कमा तीज फेष्टीबल भयो । दरखाने दिनमा आयोजना गरिएको तीज फेष्टिवलमा नेपाली संगै जापानिज नागरिक पनि उपस्थित भएका थिए । कार्यक्रम स्थलमा बालबालिकादेखि वृद्धवृद्धा सम्मको खचाखच थियो ।

रातो साडीमा सजिएका मन्जु पौडेल र सम्झना भण्डारी दौरा सुरुवालमा सजिएका बद्री पंगेनी के मन्चमा पुगेका थिए। दर्शक निकै उत्साहित बने । बालबालिका देखि वृद्धवृद्धा सम्म नाच्न थाले ।

महिना अघि धादिङबाट जापान आएकी इच्छादेवी पुडासैनीलाई नेपाल भन्दा जापानमा तीज रमाईलो लाग्यो । जापानको तोदामा बस्दै आएकी पुडासैनी छोराबुहारी संग तीज फेष्टीवलमा पुगेकी थिईन् । ७६ वर्षिय पुडासैनीको जापानको तीज पहिलो भएपनि नेपालको कत्ती पनि सम्झना थिएन । सबै संग घुलमिल गर्दै तीजको शुभकामना साट्दै थिइन् । यसै वीचमा बद्री पङगेनीले भाउजुको हाईहाई छ दाई जापान भएर भन्ने गीत गाईरहेका थिए यता पुडासैनी बुहारी र साथीसंग छमछमी नाचेकी थिईन् ।

उनी भन्छिन, “नेपाल भन्दा जापानमा तीज रमाईलो भयो ।” सबै नेपाली जम्मा भएका छन् , नेपालका कलाकार पनि यही आएका छन् उनले भनीन् । तीज फेष्टीवलमा २ हजारको संङख्या नेपाली र केही जापानिज नागरिक समेत पुगेका थिए । अर्का चर्चित गाएक पशुपति शर्मा, रमेशराज भटराई र प्रताव दासले पनि दर्शकलाई भरपुर्ण मनोरन्जन दिएका थिए । फेष्टिवल डेष्टिनी क्रिएशन र एनआरएनए जापानको संयुक्त आयोजनामा गरिएको थियो । पहिलो फेष्टिवल भएका कारण पनि होला धेरैको उत्साहजनक सहभागिता थियो । र सहभागि सबैले नेपालको संस्कृती झल्कने पोशाक लगाएका थिए । फेष्टिवल नेपाली संस्कृतीको निरन्तरता र नेपालको नुवाकोटमा रहेका अशक्त, असहाय र वेसाहारा बालबालिकाको अध्ययनमा सहयोग पुर्याउने उदेश्यले आयोजना गरिएको हो ।