पोखरा, ११ भदौ । संस्कृति, पर्यटन तथा नागरिक उड्डयनमन्त्री योगेश भट्टराईले निर्माणाधीन पोखरा अन्तर्राष्ट्रिय विमानस्थलको निर्माण समयमै पूरा गर्न निर्देशन दिनु भएको छ । पोखराको क्षेत्रिय र अन्तराष्ट्रिय विमानस्थलको काम सकेसम्म चांडो सक्नु पर्ने भन्दै मन्त्री भट्टराईले ढिला नगर्न चेतावनी ससमेत दिनुभएको छ ।

पर्यटनमन्त्री भएपछि पहिलो पटक पोखरा पुग्नु भएका उहांले विमानस्थलको निरिक्षण गर्नुभएको छ । विमानस्थलको भौतिक र वित्तीय प्रगतिको बारेमा बुझेपछि विमानस्थलको फिल्ड निरीक्षण गर्नुभएको थियो । पोखरा विमानस्थल राष्ट्रिय गौरवको समेत आयोजना भएकाले मन्त्री भट्टराईले राष्ट्रिय गौरवको आयोजनामा ढिलाइ नगर्न निर्देशन दिनु भएको हो ।

यो विमानस्थल चिनियाँ कम्पनी सिएएमसीले निर्माण गरिरहेको छ । कम्पनीका आयोजना प्रमुख विनेश मुनाकर्मीले विमानस्थलको काम ४५ प्रतिशत सकिएको जनाए । सन् २०२२ सम्मको सम्झौता भए पनि ६ महिनाअगावै काम सकिने दाबी ठेकेदार कम्पनीको रहेको छ ।