बुटवल, २४ साउन ।
मुलुकका बिभिन्न स्थानीय निकायहरुले लगानी सम्मेलन गरिरहेका बेला रुपन्देहीको तिलोत्तमा नगरपालिकाले पनि लगानी सम्मेलन गर्ने भएको छ । नगरपालिकाले आज पत्रकार सम्मेलन गर्दै आगामी असोज ९ गते तिलोत्तमा लगानी सम्मेलन आयोजना गर्ने जानकारी दिएको छ । पत्रकार सम्मेलनमा बोल्दै तिलोत्तमा नगर पालिकाका प्रमुख बासुदेव घिमीरेले नगरमा कृषि, उद्योग, व्यापार, पर्यटन, पूर्वाधार लगायतका क्षेत्रमा स्वदेशी तथा विदेशी लगानी भित्र्याउन सम्मेलनको आयोजना गर्न लागिएको बताउनु भयो । नगरप्रमुख घिमिरेले आर्थिक विकासमा निजी क्षेत्रको उपस्थितिलाई अझ व्यापक बनाउन सम्मेलन सफल हुने बिश्वास ब्यक्त गर्नुभयो । नगरपालिकाले लगानी सम्मेलनबाट २ अर्ब लगानी भित्र्याउने लक्ष्य छ लिएको छ ।
सम्मेलनमा आयोजक सहित संघीय तथा प्रदेश सरकारका मन्त्री, सांसद, प्रमुख राजनीतिक दलका नेता, सरकारका उच्चपदस्थ प्रतिनिधि, नेपालस्थित विदेशी कूटनीतिक नियोगका प्रतिनिधि, विकास साझेदार संस्थाका प्रतिनिधि, नेपाली निजी क्षेत्र, गैरआवासीय नेपाली र स्वदेशी तथा विदेशी लगानीकर्ता समेत गरी ५ सय जनाको सहभागिता रहने जनाइएको छ ।
नगरपालिकाका अनुसार सम्मेलनका लागि करीब ३० लाख खर्च हुने अनुमान गरिएको छ । यसमध्ये नगरपालिकाको तर्फबाट २० लाख रुपैंयाँ विनियोजन गरिएको छ भने बाँकी रकम निजी क्षेत्रबाट जुटाउने लक्ष्य रहेको नगरपालिकाले जनाएको छ । सम्मेलनमा सहभागिताका लागि मुलुकका विभिन्न स्थानमा अन्तरक्रिया समेत गरिनेछ । लगानी सम्मेलनमा स्वदेशी विभिन्न औद्योगिक तथा व्यापारिक घरनाहरूका साथै भारत, चीनबाट लगानीकर्ताहरू सहभागी हुनेछन् ।

तिलोत्तमा नगरपालिका २०७१ सालमा स्थापित नयाँ नगरपालिका हो । साविकका सात वटा गाविस शंकरनगर, आनन्दवन, करहिया, मक्रहर, गंगोलिया, मधवलिया, टिकुलिगढ मिलेर बनेको तिलोत्तमा नगरपालिका तीव्र शहरीकरण भैरहेको क्षेत्र हो ।