काठमाडौं, १८ साउन । नेपाली कम्युनिष्ट आन्दोलनका शिर्ष नेता तुलसीलाल अमात्यको २२ औँ स्मृति दिवस मनाइएको छ । तुलसीलालको सक्रियता, योगदानका कारण आज कम्युनिष्ट पार्टी नेपाली जनताले भरोसा गर्न लायक भएको वक्ताहरुले धारणा राखेका छन् ।

शुक्रबार कम्युनिस्ट नेता तुलसीलाल अमात्यको २२ औं स्मृति दिवस मनाइएको छ । तुलसी लाल स्मृति प्रतिष्ठानको आयोजनामा नेता अमात्यको स्मृति दिवस मनाइएको हो । कम्युनिस्ट नेता तुलसीलाल अमात्य ललितपुरको क्वाँबहाल टोलमा सन् १९१६ मा जन्मिएका थिए ।

वि.सं. २०१५ सालको आमनिर्वाचनमा ललितपुरबाट प्रतिनिधिसभामा सदस्य निर्वाचित भई नेपाल कम्युनिस्ट पार्टीको संसदीय दलको नेता निर्वाचित भएका नेता अमात्य सन् १९४५ मा नेपाल मजदुर किसान संगठनको निर्माण गरी संस्थापक अध्यक्ष भएका थिए ।

सन् १९६१ मा बनारसमा सम्पन्न नेपाल कम्युनिस्ट पार्टीको तेस्रो महाधिवेशनबाट महासचिव, नेपाल कम्युनिस्ट पार्टीको विभाजनपछि नेकपा (अमात्य)को गठन गरी नेतृत्व सम्हालेका थिए । सन् १९३३ देखि राजनीतिमा सक्रिय रहेका नेता अमात्य भारत स्वतन्त्र भएको खुसीमा सन् १९४७ अगस्ट १५ तारिखमा पाटनमा भएको जुलुसको नेतृत्व गर्दा पहिलो पटक छ महिना जेल परेका थिए ।

सन् १९४३ मा भारतको लखनऊबाट अर्थशास्त्रमा स्नातकोत्तर गरेका नेता अमात्य राजनीतिक जीवनक्रममा सन् १९४८ मा नेपाली राष्ट्रिय कांग्रेसको केन्द्रीय कार्यसमितिको सदस्य रहेका थिए । सन् १९७९ मा आममाफी पाएपछि स्वदेश फर्केका नेता अमात्य २०४६ सालको जनआन्दोलनमा संयुक्त वाममोर्चाको मानार्थ अध्यक्ष भए, भने नेकपा एमालेको पाँचौँ अधिवेशनपछि उनी एमालेमा समाहित भए । सन् १९६० मा पंचायती शासनकालमा उनको सर्वस्वहरण गरियो । अमात्यले पञ्चायती शासनको यातनाको वास्ता नगरी २०४६ सालको आन्दोलनमा अग्रणी भुमिका खेलेको स्मरण गर्छन् नेपाल कम्युनिष्ट पार्टी(नेकपा) का बरिष्ठ नेता माधवकुमार नेपाल ।

नेता अमात्य निडर र आत्मविश्वासी नेता थिए । अमात्यले पार्टी कामको शिलशिलामा रौतहट, सर्लाही, बारामा गएर किसान आन्दोलनलाई अझ मजबुद बनाउने काम गरे । किसानलाई जागरुक र संगठित बनाउन उनको महत्वपूर्ण भुमिका रहेको थियो । सन् १९५० मा दिल्ली सम्झौताको विरोध गरेवापत उनी मोतिहारी जेलमा आठ महिना बन्दी हुन बाध्य भए । किसानको हितका लागि लडेका नेताको सपना पुरा गर्नकै लागि भएपनि आजको कम्युनिष्ट नेताले जनतालाई स्वदेशमै रोजगार बनाउनको निम्ति पहल थाल्नुपर्ने नेकपाका नेताहरुको भनाइ छ । नेपाली जनलाई रोजगार दिई देशलाई समृद्ध बनाउन सके मात्र अमात्य जस्ता नेताको योगदानको कदर हुने नेता मोदनाथप्रश्रितले बताए। बा

नेता अमात्यले कुन बाटो’, ’राष्ट्रिय प्रजातान्त्रिक कार्यक्रम’, ’समाजवादी दलको संगठनात्मक समीक्षा’ जस्ता पुस्तकको रचना समेत गरेका थिए । उनी नेकपा एमालेको पहिलो पटक सरकार बनेका बेला चीनका लागि नेपाली राजदूत समेत भएका थिए । नेता अमात्यको त्याग, तपस्या र बलिदानीकै कारण आज नेपालमा कम्युनिष्ट पार्टीप्रति नेपाली जनताको भरोसा र विश्वा भएको नेकपाका नेताहरुको दावी छ ।

अमात्य जस्ता त्यागी नेताहरुको सक्रियता, योगदान र सपनाका कारण आज कम्युनिष्ट पार्टी यो हैसियतमा पुगेको हो । अमात्यलाई स्मृति दिवसको दिन मात्र सम्झिने होइन कि उनको जीवनीबाट कम्युनिस्ट आन्दोलनको नेतृत्वमा रहेका नेतृत्वले आत्मसाथ गर्न सके अमात्यप्रतिको सच्चा सम्मान हुनेछ ।