बाँके, १६ साउन । बाँकेसहित देशका विभिन्न जिल्लामा अज्ञात समूहले एनसेलका टावरहरुमा आगजनी गरेको छ ।
नेपाल प्रहरीका अनुसार देशका दुई दर्जनभन्दा बढी एनसेलका टावरमा बुधबार राती अज्ञात समूहले आगजनी गरेको हो । बाँकेमा पनि दुई स्थानमा रहेका एनसेलका टावरमा अज्ञात समूहले आगजनी गरेको छ ।

नेपालगञ्ज उप–महानगरपालिका २० मनिकापुर नयाँबस्ती र डुडुवा गाउँपालिका–४ मेहमानपुर कम्दीमा रहेको टावरमा आगजनी गरिएको बाँके प्रहरीले जनाएको छ । एनसेलको टावरमा जुटको बोरामा पेट्रोल छर्केर आगजनी गरिएको हुनसक्ने जिल्ला प्रहरी कार्यालय बाँकेका प्रवक्ता तथा प्रहरी नायब उपरीक्षक प्रकाश सापकोटाले जानकारी दिए । आगजनीबाट टावरका तारहरुमा क्षति पुगेको उनले बताए । बाँकेसहित अर्घाखाँची, धादिङ, कपिलवस्तु, झापा, रुपन्देही, कैलाली, नवलपरासी (पूर्व), सिन्धुपाल्चोक, डडेल्धुरा, पर्वत, म्याग्दी र बाग्लुङमा समेत एनसेलका टावरमा आगजनी भएको प्रहरीले जनाएको छ ।

विस्फोट तथा आगजनी नेत्रविक्रम चन्द विप्लव नेतृत्वको नेपाल कम्युनिस्ट पार्टीले गरेको हुन सक्ने अनुमान प्रहरीको छ । नेता कार्यकर्ता पक्राउ पर्ने क्रम बढेपछि पार्टीले बुधबार बन्दको घोषणा गरेको थियो । बन्द सकिएको राति देशभर आगजनी र तोडफोडका घटना भएका हुन् । आगजनी गर्ने समूहको खोजी कार्य जारी गरेको प्रहरीले जनाएको छ ।