काठमाण्डौं, १० कात्तिक । अमेरिकी राष्ट्रपति डोनल्ड ट्रम्पले अमेरिकीहरुका, दुखाइ कम गर्ने र अन्य नसालु औषधीहरु प्रयोग गर्ने लतलाई “राष्ट्रिय लज्जा“ भन्दै जनस्वास्थ्यसम्बन्धी संकटकाल घोषणा गरेका छन् ।

ट्रम्पले दुखाई कम गर्ने यस्ता औषधीको दुरुपयोगलाई लक्षित गरि यो घोषणा गरेको बताएका छन् । यस्ता औषधीको प्रयोगका कारण प्रत्येक दिन १ सय ४० भन्दा बढी अमेरिकीहरुको ज्यान जाने गरेको बताइएको छ । राष्ट्रपति ट्रम्पले यसअघि नै जनस्वास्थ्यसम्बन्धी राष्ट्रिय संकटकाल घोषणा गर्ने बाचा गरेका थिए । ह्वाइट हाउसमा बोल्दै ट्रम्पले अहिलेको समयमा अमेरिकीहरुको कार दुर्घटना र बन्दुकका कारण हुने मृत्युको संख्या भन्दा दुखाई कम गर्ने र अन्य नसालु पदार्थको प्रयोगका कारण बढी मृत्यु हुने गरेको बताए । उनले अमेरिकी समाज नसालु औधषीको प्रयोगले नसताएको कुनै भाग नभएको बताए । ट्रम्पले नसा नलाग्ने नयँ“ किसिमका औषधीहरुका लागि अनसन्धानहरु आवश्यक रहेको बताए । उनले यस्ता दुखाई कम गर्ने औषधीहरुको खपत विश्वका अन्य मुलुकका नागरिकले भन्दा अमेरिकीहरुले अत्यधिक गर्ने बताए । अहिलेको घोषणाले जनस्वास्थ्यसम्बन्धी देखिएको संकटसंग जुध्नका लागि अनुदान रकम प्रयोग गर्न निर्देशित गर्ने बताए ।

ह्वाइट हाउसले यसका लागि जनस्वास्थ्यसम्बन्धी आपतकालीन राहतमा भएको भनिएको ५७ हजार डलरलाई प्रयोग गर्ने योजना गरेको छ । दुखाइ कम गर्ने र नसालु औषधीको बढी प्रयोगले अमेरिकामा एक सातामा एक हजार भन्दा बढीको मृत्यु हुन्छ । आलोचकहरुले अहिलेको घोषणा अनुसार थप आर्थिक कोषहरु बिना केवल अहिलेकै स्रोतको प्रयोग गरेर त्यसले समस्या घटाउन मद्दत नगर्ने बताएका छन्।