काठमाडौँ, १७ जेठ । बागलुङ नगरपालिका–११ रायडाँडामा निर्माणाधीन वडा कार्यालय भवन अलपत्र परेको छ ।

बजेट अभावका कारण भवन निर्माणको काम अधुरै रहेको वडाध्यक्ष ज्ञानेन्द्र गौतमले बताउनुभयो । द्वन्द्वकालमा क्षति पुगेपछि शान्ति तथा पुनर्निर्माण मन्त्रालयमार्फत भवन निर्माण शुरु भएको थियो ।

मन्त्रालय खारेज भएसँगै दुई वर्षदेखि भवन अलपत्र अवस्थामा पुगेको हो । आठ लाख ५० हजार बजेटबाट जग र पिलरका लागि डण्डी मात्र ठडाइएको छ । “बजेटका लागि सम्बन्धित मन्त्रालयमा माग गरिरहेका छौँ”, वडाध्यक्ष गौतमले भन्नुभयो, “माथिबाट नभए बागलुङ नगरपालिकाकै बजेटबाट भवन बनाउनुपर्छ ।”

भवन नबन्दा अहिले वडा कार्यालय भाडाको कोठाबाट सञ्चालित छ । बन्द भएको निजी विद्यालयको जीर्ण कोठामा वडा कार्यालय छ । साँघुरो र अव्यवस्थित कार्यालयका कारण सेवा प्रवाह सहज छैन । “अहिले भाडामा बसेको कोठा पनि भूकम्पका कारण जोखिममा छ”, वडाअध्यक्ष गौतमले भन्नुभयो ।

स्थानीय तह निर्वाचन भएको दुई वर्ष बितिसक्दा पनि वडाको आफ्नै भवन नबन्दा स्थानीयवासी पनि चिन्तित छन् । जतिसक्दो छिटो बजेट व्यवस्थापन गरेर सुविधायुक्त वडा कार्यालय भवन बनाउनुपर्ने गाउँलेको माग छ ।

“भवन निर्माण नगरपालिकाले गर्नुपर्छ”, स्थानीयवासी नवीन केसीले भन्नुभयो, “वडा कार्यालयकै भवनलाई बजेट नहुनु दुःखद विषय हो ।” विकट भूगोलका कारण रायडाँडा विकासमा पछाडि छ । निर्वाचित प्रतिनिधि आएपछि पूर्वाधार निर्माणका कामले प्राथमिकता पाएका छन् । सडक, विद्यालय, स्वास्थ्यचौकीलगायत निर्माणाधीन अवस्थामा छन् । सामाजिक, आर्थिक विकासका लागि पनि वडाले बजेटमार्फत काम अघि बढाएको छ । लक्षित वर्गको क्षमता विकासमा पनि वडाको प्राथमिकता छ ।

बागलुङ सदरमुकामदेखि १८ किमी दूरीमा रहको यो वडालाई कठिन भूगोल, अविकासजस्ता कारणले ‘बागलुङ नगरपालिकाको कर्णाली’ समेत भन्ने गरिन्छ । अहिले सबैतिर निर्माणको काम भइरहेको र केही वर्षमा देखिने गरी विकास हुने वडाध्यक्ष गौतमको भनाइ छ ।