काठमाडौँ, १४ जेठ ।  भूमि, व्यवस्था, सहकारी तथा गरीबी निवारणमन्त्री पद्मा अर्यालले सरकारले सुकुम्वासीका लागि योजना बनाइसकेको बताउनुभएको छ । नापी विभागको ६३ औँ वार्षिकोत्सवका उपलक्ष्यमा आज आयोजित कार्यक्रममा उहाँले सहकारी र भूमि विभागमार्फत गरीबी घटाएर शूून्य बनाउने सरकारले योजना बनाएको जानकारी गराउनुभयो ।

“अहिले हाम्रो लागि भूमि व्यवस्थापन चूनौतीपूर्ण बन्दै गएको छ”, उहाँले भन्नुभयो । उहाँले जनताको चाहनाअनुरुप सरकारले विभिन्न क्षेत्रमा पारदर्शीता कायम गर्दै लैजाने लक्ष्य बनाएको बताउनुभयो । “अहिले हामी निकै चुनौतीपूर्ण अवस्थामा छौँ”, उहाँले भन्नुभयो, “सिद्धान्त बनाउनु सरकारको काम हो, त्यसलाई कर्मचारीले कार्यान्वयनमा ल्याउनुपर्छ ।” सो अवसरमा राष्ट्रिय योजना आयोगका सचिव डा दिलबहादुर गुरुङले भर्खरै सम्पन्न सगरमाथाको उचाइ मापनले विभागको उचाइ बढेको बताउनुभयो । “नेपाल गरीब देश भए पनि आफैँले उचाइ मापन गर्न सक्नु गौरवान्वित विषय हो”, उहाँले भन्नुभयो ।

भूमि, व्यवस्था, सहकारी तथा गरीबी निवारण मन्त्रालयका सचिव गोपीनाथ मैनालीले कुनै पनि संस्थाले संस्थागत रुपमा काम गरे उपलब्धि हासिल गर्न सक्ने बताउनुभयो । जल तथा ऊर्जा आयोगका सचिव मधुसुदन अधिकारीले छोटो समयमा नै विश्वका अन्य देशसँग नेपालले प्रतिस्पर्धा गरेको उल्लेख गर्नुभयो । नापी विभागका महानिर्देशक प्रकाश जोशीले विभागले सगरमाथाको उचाइ मापन गर्नुपूर्व विभिन्न अन्तर्राष्ट्रिय गोष्ठीको आयोजना गरेको बताउनुभयो । सो अवसरमा सगरमाथा मापन टोलीका प्रमुख खिमलाल गौतमलगायत सात व्यक्तिलाई सम्मान गरिएको थियो ।