काठमाडौँ, १४ जेठ । अख्तियार दुरुपयोग अनुसन्धान आयोगले एक डाइभिङ इन्टिच्युटमा एक कर्मचारीको समेत मिलमतोमा हेभी इक्विपमेन्ट डिभिजन कार्यालय पोखरामा अरेटर पदमा कार्यरत कर्मचारीले रु ४० हजार घुस लिएको अभियोगमा आज पक्राउ गरिएको छ ।

आयोगका प्रवक्ता प्रदीपकुमार कोइरालाका अनुसार अपरेटर कुमार लामिछाने र मेट्रो ड्राइभिङका सञ्चालक खगेन्द्र लामिछानेले सवारी चालक अनुमतिपत्रको परीक्षामा उत्तीर्ण गराइदिने भन्दै घुस मागेको पाइएको छ । आरेपीद्वयलाई पोखरा महानगरपालिका १८ ड्यामसाइटस्थित होटल बार्दलीबाट पक्राउ गरिएको हो । आरेपीद्वयलाई सोमबार पक्राउ गरिएको भए पनि आज सार्वजनिक गरिएको आयोगले जनाएको छ ।

उनीहरुको थप अनुसन्धान भइरहेको छ । कालिका शहीद शान्ति पार्क निर्माणको लागि प्राप्त भएको रकम हिनामिना गरेको अभियोगमा जिल्ला समन्वय समितिको कार्यालय तनहुँमा कार्यरत प्राविधिक सवइञ्जिनीयर खगेन्द्र खबास र व्यास नगरपालिकाका प्राविधिक सवइञ्जिनीयर निर्मल वाग्लेविरुद्ध विशेष अदालतमा मुद्दा दायर गरिएको छ । उनीहरुमाथि मन्दिर निर्माणको सिलसिलामा लागतबमोजिम काम भए नभएको परीक्षण नगरी काम भएको भन्दै प्रतिवेदन दिई भ्रष्टाचार गरेको अभियोग लागेको छ । आयोगले जिल्ला शिक्षा कार्यालय प्यूठानअन्तर्गत शिक्षक पदमा कार्यरत विमला आचार्यको शैक्षिक योग्यताको प्रमाणपत्र नक्कली रहेको अभियोगमा विशेष अदालतमा मुद्दा दायर गरेको छ ।

त्यस्तै बिपी कोइराला स्वास्थ्य विज्ञान प्रतिष्ठानको प्रशासनिक सहायक पदमा कार्यरत मोहम्मद सईदुरहमानको शैक्षिक योग्यताको प्रमाणपत्र नक्कली रहेको अभियोगमा विशेष अदालतमा मुद्दा दायर गरिएको छ । आयोगका अनुसार काँडा भवानी मावि बाजुरामा कार्यरत शिक्षक भक्तबहादुर सिंहको शैक्षिक योग्यताको प्रमाणपत्र नक्कली रहेको अभियोगमा आजै विशेष अदालतमा मुद्दा दायर गरिएको छ । त्यस्तै आयोगले सिराहा प्राथमिक विद्यालय, रामपुरविर्ता ५, सिराहामा छात्रा शौचालय निर्माण गर्न भनी निकासा भएको सरकारी अनुदान रकम अनियमितता गरेको अभियोगमा विद्यालय व्यवस्थापन समितिका तत्कालीन अध्यक्ष रामभरोस मण्डल र प्रधानाध्यापक वसन्तकुमार मण्डलले अनियमितता गरेको जनाएको छ ।

उनीहरुले सरकारी रकम मास्ने उद्देश्यले नक्कली जग्गाधनी प्रमाणपूर्जा बनाई रु चार लाख हिनामिना गरेको पाइएको छ । आरोपी रामभरोसको निधन भइसकेकाले उनको हकवालाविरुद्ध र प्रधानाध्यापक मण्डल मुद्दा दायर गरेको आयोगले जनाएको छ ।