दोलखा,२ जेठ । दोलखामा आगलागी हुँदा सात करोड मुल्य बराबरको क्षति भएको छ । गए राति जिल्लाको भिमेश्वर नगरपालिका वडा नं. ३ चरिकोट बसपार्कमा स्थानीय तुना बहादुर खत्रीको घरमा आगलागी हुँदा ठूलो क्षति भएको हो ।

राती करीब १ः३० बजेको समयमा घरको दोश्रो तल्लामा विद्युत करेन्ट सर्ट भई आगलागी भएको जिल्ला प्रहरी कार्यालय दोलखाले जनाएको छ । दोश्रो तल्लामा त्रिपुरा रिहान टायर रिसोलिङमा अचानक करेन्ट सर्ट भएको र उक्त रिसोलिङ सेन्टर पूर्णरुपमा क्षति भएको छ ।

आगलागी हुँदा रिसोलिङ सेन्टरको हावा भर्ने ग्यास विस्पोट हुँदा आवजले तुनाबहादुर खत्रीको श्रीमती ५५ वर्षिय साधा खत्री बेहोस भएकी छिन् भने भाग्ने क्रममा उनको छोरा २५ वर्षिय राजु खत्रीलाई आगोले पोलेर सामान्य घाइते भएको प्रहरी निरीक्षक रेशम बोहराले जानकारी दिएका छन् ।

आगो राती १ः३० बजेबाट शुरु भए पनि नेपाल प्रहरी, नेपाली सेना सशस्त्र प्रहरी, भिमेश्वर नगरपालिकाको दमकल तथा स्थानीयको सक्रियतामा विहान ५ बजेमा मात्र पूर्णरुपमा नियन्त्रमा आएको थियो ।