काठमाडौ,२९ बैशाख । नेपाली कांग्रेसका सांसद ज्ञानेन्द्र बहादुर कार्कीले राजनीतिक आग्रह र पुर्वाग्रहबाट मुक्त हुन सरकारलाई सुझाव दिनुभएको छ ।

प्रतिनिधिसभाको आईतबारको बैठकमा आगामी आर्थिक बर्षको बजेटका सिद्धान्त र प्राथमिकता माथिको छलफलमा आफ्नो धारणा राख्दै सांसद कार्कीले अर्थमन्त्री डाक्टर युवराज खतिवडालाई राजनीतिक आग्रह र पुर्वाग्रहबाट मुक्त हुन सुझाव दिनुभएको छ ।

उहाँले भन्नुभयो “मुलुकको ढुकुटीको चावी बोकेको सरकारको अर्थमन्त्रीले राजनीतिक आग्रह र पुर्वाग्रह भन्दा माथि उठेर यथार्थवादी हुनु जरुरी छ । आफु बाहेक अरु सबै खराब हुन भन्ने दर्शनले अर्थतन्त्रलाई सही बाटो दिन सक्दैन । ”

सरकारले यत्रतत्र जथाभावी कनिका जसरी बजेट छरेर भोटको राजनीतिलाई सुरक्षा गर्ने अस्त्रको रुपमा लिएको भन्दै उहाँले त्यस तर्फ गम्भीर ध्यानाकर्षण गराउनुभयो ।

सामाजिक सुरक्षाको दायरामा ल्याउने गरि बजेट तर्जुमा गर्ने ,कृषि उत्पादनमा वृद्धि , आयात निरुत्साहीत र निर्यात वृद्धि, व्यापार घाटा कम गर्ने तथा राजश्व प्रणालीलाई लगानी मैत्री बनाउने भनिएपछि प्राथमिकतामा नपरेको भन्दै यसबारे स्पष्ट योजना आउनुपर्नेमा उहाँले जोड दिनुभयो । बजेटको अनुशासन कायम भएको भन्ने सरकारको दाबी सही नभएको टिप्पणी उहाँले गर्नुभयो ।