दाङ,२० बैशाख । दाङको घोराही स्थित कारागार भित्र रहेका भाई नाईके र कैदी बन्दीबीच कुटाकुट हुँदा ५ जना घाईते भएका छन् ।

घाईते मध्ये ४ जनाको टाउकोमा चोट लागेको छ, भने १ जनाको हात भाचिएको कारागार शाखाले जनाएको छ । शुक्रबार २ वजे एकाएक झडप भएको थियो । घाईते ४ जनाको राप्ती स्वास्थ्य विज्ञान प्रतिष्ठानमा उपचार गरि हाल कारागार मै राखिएको छ ।

एक जना घाईतेको कुमको हड्डी भाँचिएको आशंकामा उपचारका लागि प्रतिष्ठानमै राखिएको छ । कारागारका नाईके र कैदीबन्दी बीच आन्तरिक व्यवस्थापनका विषयमा कुरा नमिल्दा झडप भएको प्रमुख जिल्ला अधिकारी गोविन्द रिजालले बताउनुभयो । भाई नाईकेले कैदिबन्दीहरुलाई समान व्यवहार नगरेको भन्दै विवाद भएपछि झडपमा परिणत भएको बताईएको छ ।

नाईकेको व्यवहार समान नभएपछि समुह नै बनाएर विवाद भएको र कुटाकुट भएको हो । नाईकेले समान व्यहार नगर्ने, सेवा सुबिधा उपभोगमा बिभेद गर्ने, बोलि व्यवहारमा दवाउने जस्ता कार्यहरु भएपछि पिडितहरुले समुह नै बनाएपछि झडपको स्थिती आएको बताईएको छ ।

कारागार ऐन २०१९ अनुसार जघन्य अपराध नगरेको, निश्चित कैद भुक्तान गरेको र आचरण राम्रो भएको कैदिलाई नाईकेको जिम्मेवारी कारागार प्रशासनले दिने अधिकार छ । यसैविच कैदिबन्दीहरु बिच भएको कुटाकुटको विषयमा छानविन गर्न जिल्ला प्रशासन कार्यालयले तीन सदस्य समिति गठन गरेको छ ।

जिल्ला प्रशासन कार्यालयका प्रशासकिय अधिकृत अमरराज शर्माको नेतृत्वमा नेपाल प्रहरी र शसस्त्र प्रहरीका प्रहरी निरीक्षक एक एक जना गरि ३ सदस्यिय छानविन समिति गठन भएको हो । समितिले ३ दिन भित्र घटनाका बारेमा सत्यतथ्य बाहिर ल्याउने अधिकार पाएको छ ।

हाल घोराही कारागारमा ३ सय बढी कैदीबन्दीहरु बस्दै आएका छन् । ७० जनाको क्षमता रहेको कारागारमा अहिले ३ सय १७ जना कैदी बन्दी बस्दै आएको जेलर विष्णु पाण्डेले जानकारी दिनुभयो ।