विराटनगर,२२ चैत । समयमै सचेत नभएमा भविष्यमा आँशु चुहाउनुपर्ने धारणा वक्ताहरुले व्यक्त गरेका छन् । एक्सन नेपाल, नेपाल पत्रकार महासङ्घ मोरङ शाखा र स्वास्थ्य पत्रकार मञ्चद्वारा संयुक्त रुपमा आज यहाँ आयोजित “सुर्तीजन्य पदार्थ नियन्त्रामा प्रदेश तथा स्थानीय सरकारको भूमिका विषयक” अन्तक्र्रिया कार्यक्रममा उनीहरुले सुर्तीजन्य पदार्थ सेवनले मानिस अकालमै ज्यान गुमाउनु परेको र यसबाट प्रशस्त धन पनि क्षति भइरहेकाले यसतर्फ सचेत रहन सबैमा आग्रह गर्नुभयो ।

उनीहरुले सुर्तीजन्य पदार्थको सेवनबाट नेपालमा वर्षेनी करीब २७ हजार मानिसले ज्यान गुमाउनु परेकाले यसको उपयोगलाई जतिसक्दो छिटो त्याग गर्नुपर्ने बताउनुभयो । कार्यक्रममा प्रदेश नं १ का सामाजिक विकासमन्त्री जीवन घिमिरेले सुर्तीजन्य पदार्थको नियन्त्रणका लागि कानूनको प्रभावकारी कार्यान्वयनसँगै जनचेतनामूलक अभियानलाई व्यापक बनाउनुपर्ने बताउनुभयो ।

उहाँले सुर्तीजन्य पदार्थको प्रयोगबाट हुने रोग, मृत्यु र यसको दुश्परिणामको न्यूनीकरणका लागि सबैले आ आफ्नो क्षेत्रबाट प्रतिबद्धता व्यक्त गर्नुपर्ने बताउँदै यसको न्यूनीकरणमा प्रहरी प्रशासनको सहयोग हुनेमा जोड दिनुभयो ।

क्यान्सर रोग विशेष प्रा डा विष्णुदत्त पौडेल र क्यान्सर, स्वास्थ्य मन्त्रालयका सहसचिव बद्रिबहादुर खड्का, एक्सन नेपालका आनन्दबहादुर चन्द, स्वास्थ्य मन्त्रालय कानून शाखा प्रमुख पुष्कर नेपाल, विराटनगर महानगरपालिकाका कार्यकारी अधिकृत एकदेव अधिकारी, स्वास्थ्य पत्रकार मञ्चका अध्यक्ष मञ्जु आचार्य र महासङ्घ मोरङका अध्यक्ष बन्दु पोखरेलले सुर्तीजन्य पदार्थको नियन्त्रणका लागि विधमान ऐन कानूनको प्रभावकारी कार्यान्वयन गर्नु जरुरी छ भन्नुभयो ।