काठमाडौँ, २० फागुन । बाँकेको राप्तीसोनारी गाउँपालिका–३ वैजापुरस्थित भुवर भवानी सामुदायिक वनलाई जिल्लाकै नमूना वन बनाउन महिला कस्सिएका छन् । 

एघार जनाको कार्यसमितिमा कार्यकारी पद अध्यक्ष, सचिव, कोषाध्यक्षसहित सात महिला छन् । चार मात्र पुरुष छन् । विसं २०६० मा स्थापना गरिएको सो वनको नेतृत्व लिने कोही नभएपछि चार वर्ष अघि सीता परियारको अध्यक्षतामा कार्यसमिति चयन गरिएको थियो । “उपभोक्ताको मन जितेर काम गर्दै आएका छौँ”, अध्यक्ष परियारले भन्नुभयो, “हामी नेतृत्वमा पुग्नु अघि संस्था ऋणमा थियो । ऋण तिर्नुपर्ने भएपछि वनको नेतृत्व सहजरुपमा महिलालाई जिम्मा लगाइएको हो ।” 

“ऋण चुक्ता गरी संस्थालाई मुनाफामा पु¥याएका छौँ”, उहाँले भन्नुभयो । भुवर भवानी सामुदायिक वन उपभोक्ता समूह बाँकेकै नमूना बन्न पुगेको छ । समूहले नमूना भवनसमेत निर्माण गरेको छ । समूहमा अहिले रु तीन करोडभन्दा बढीको काठ सञ्चित छ । काठ बेचेर प्राप्त भएको रु १७ लाखसहितको रकमले भवन निर्माण गरिँदै छ । “अहिलेसम्म रु २५ लाख खर्च भइसकेको छ”, अध्यक्ष परियारले भन्नुभयो । 

सिक्टा सवडिभिजन वन कार्यालयका प्रमुख सहायक वन अधिकृत मनोज साहले संस्थालाई उकास्न महिलालाई नेतृत्व सुम्पिएको बताउनुभयो । स्थानीय उपभोक्ता एवं पूर्व सांसद पट्टु थारू महिलाले नेतृत्व गरेको सामुदायिक वन उदाहरणीय बनेको बताउनुहुन्छ । समूहमा आयस्रोत जुटाएपछि पदको लागि तछाडमछाड शुरु भएको समूहकी सचिव सङ्गीता थारूले बताउनुभयो । वनसँग साल, अस्ना, जामुन, कर्मालगायतको १२ हजार क्युफिट काठ मौज्दात छ ।