सप्तरी, ७ असोज । सप्तरीका १८ मध्ये १३ स्थानिय तहको मतपरिणाम सार्वजनिक भएको छ ।
जसमा काँग्रेस र संघीय समाजवादी फोरम नेपाल चार÷चार स्थानीय तहमा बिजयी भएका छन् भने राजपा नेपाल तीन तथा एमाले र नयाँ शक्तिले एक÷एक स्थानीय तह जितेका छन् । पछिल्लो मतपरिणाम अनुसार काँग्रेसले सप्तरीमा चौथो जित हासिल गरेको छ । सुरुङा नगरपालिका काग्रेसका मुक्तिनाथ चौधरीले ५२७९ मत तथा उपमेयरमा काँग्रेसकी बिन्दा देवी पासवानले ५ हजार ३६ मत पाएर बिजयी हुनुभयो ।

यस्तै, संघीय समाजवादी फोरम नेपालले पनि सप्तरीमा चार स्थानीय तहमा जित हासिल गरेको छ । पछिल्लो पटक बोदे बर्साइन नगरपालिकामा मेयर र उप–मेयर दुबैमा फोरम नेपालका उम्मेदबार विजयी भएका छन् । मेयर पदमा आतिश सिंह यादव ४५४७ मत तथा उपमेयरमा रंजु कुमारी साहले ३७२१ मत प्राप्त गर्दै जित हासिल गरेका हुन् ।

यस्तै फोरम नेपालले जिल्लाको बलान बिहुल गाउँपालिकामा पनि जित हासिल गरेको छ । सो गाउँपालिकामा फोरमका अध्यक्षमा दयानन्द गोइतले २३३८ तथा उपाध्यक्षमा फोरमकै रुबी कुमारी गुप्ताले १८०२ मत प्राप्त गरिन् । त्यसैगरि फोरमले महदेवा गाउँपालिको अध्यक्षमा दिपककुमार यादवले ३०९१ र उपाध्यक्षमा फोरमकै ममता यादवले २७४९ मत ल्याएकी छिन् ।
यस्तै तिलाठी–कोइलाडी गाउँपालिकामा राजपाले जितेको छ । यो जितसँगै राजपाले जिल्लामा तेश्रो जित हासिल गरेको हो । तिलाठी–कोइलाडी गाँउपालिकाको प्रमुखमा सतिश कुमार सिंहले २९८७ मत र उपप्रमुखमा सुचिता कुमारी यादवले २८७२ मत प्राप्त गरि निर्वाचित भएका हुन् ।

यता नयाँ शक्ति पार्टीले समेत सप्तरीबाटै आफ्नो खाता खोलेको छ । नयाँ शक्तिले जिल्लाको छिन्नमस्ता गाउँपालिकामा जित हासिल गरेको हो । सो गाउँपालिकाको अध्यक्षमा सूर्यनारायण मण्डलले २८०५ मत प्राप्त गरि बिजयी हुनुभयो भने उपाध्यक्षमा भने राजपाकी उषा कुमारी मण्डलले १७१० मत प्राप्त गरि बिजयी भइन् ।
यसरी सप्तरीमा काँग्रेसले विष्णुपुर, अग्निसाइर कृष्णासवरण, बेल्ही चपेना गाउँपालिका र सुरुङ्गा नगरपालिकामा गरि चार स्थानीय तहमा जित हासिल गरेको छ । यस्तै संघीय समाजवादी फोरम नेपालले बोदेबसाईन नगरपालिकासहित वलान बिहुल, महदेवा र तिरहुत गाउँपालिका गरि चार स्थानमा जित हासिल गरेको छ ।

यसैगरि राजपाले जिल्लाको डाक्नेश्वरी नगरपालिकासहित रुपनी र तिलाठी कोइलाडी गाउँपालिकागरि तीन स्थानीय तहमा बिजयी भएको छ भने एमालेले जिल्लाको सप्तकोशी नगरपालिकामा जित हासिल गरेको छ ।
यता बाँकी रहेको पाँच मध्ये चार नगरपालिकाको मतगणना जारि रहेको छ । कंचनरुप, शम्भुनाथ, खडक र हनुमाननगर कंकालिन नगरपालिकाको मतगणना जारि रहेको छ भने राजविराज नगरपालिकाको मतगणना स्थगित भएको छ ।

मतगणना गरिएको मतपत्र भन्दा कम मत मेयर पदमा आएपछि राजनीतिक दलका प्रतिनिधीहरुले मतपत्र लुकाएको आरोप लगाउँदै पुनः मतगणनाको माँग गरेका छन् ।