विराटनगर,२८ मङसिर । विराटनगर महानगरपालिका–१७ धुनिया बस्तीमा आफ्नै छोराले बुबालाई छुरा प्रहार गरी हत्या गरेका छन । घरायसी विवादका कारण बिहीबार २२ वर्षिय छोरा चुनु मण्डलले छुरा प्रहार गर्दा बुबा शशी मण्डलको हत्या गरेका हुन ।

छुरा प्रहार गर्दा दाजु आकाश पनि घाइते भएका छन् । छुरा प्रहारबाट घाइते भएका बुबा शशीलाई उपचारका लागि विराटनगरस्थित नोबेल मेडिकल कलेजमा पुर्‍याइएको थियो ।

उनको उपचारको क्रममा राति १० बजे मृत्यु भएको जिल्ला प्रहरी कार्यालय मोरङका प्रहरी नायव उपरीक्षक घनश्याम श्रेष्ठले बताएका छन । घरायसी विवादकै क्रममा मादक पदार्थ सेवन गरेका चुनुले छुरा प्रहार गरेको प्रहरीले जनाएको छ ।

छुरा प्रहारबाट घाइते भएका आकाश मण्डलको नोबेल मेडिकल कलेजमा उपचार भैरहेको बताइएको छ ।

बुबा र दाजुलाई छुरा प्रहार गरी फरार भएका मण्डललाई प्रहरीले नेपाल भारतको सीमा क्षेत्रबाट शुक्रबार बिहान नियन्त्रणमा लिएको छ । घटनाको विषयमा अनुसन्धान भइरहेको प्रहरीले जनाएको छ ।