पोखरा,२३ मङसिर । पोखरा महानगरपालिकाको वडा नम्बर १३ ले वडावासीको सम्पूर्ण लागत राख्ने गरी स्मार्टकार्ड वितरण गरेको छ । पोखरामानै पहिलो पटक स्मार्ट लाइसेन्सको जिम्मा लिएको मालिका सफ्टवेयर नेपालको प्राविधीक सहयोगमा पोखरा महानगरको १३ नम्बर वडाबाट स्थानिय तहबाट स्मार्टकार्ड प्रदान गरिएको हो । वडाबासी शोभाकान्त सिग्देललाई वडाअध्यक्ष दर्शन लामाले स्मार्ट कार्ड प्रदान गरी स्मार्ट कार्डको सुरुवात गरेका हुन ।

वडाबासीले वडाबाट पाउने सुविधालाई सरल र छिटो छरितो ढंगले प्रदान गर्नका लागी वडाले स्मार्ट कार्ड लागु गर्न लागेको हो । वडामा रहेका वडा बासीको जनसंख्या, घरको पारिवारिक विवरण, सम्पति विवरण, बस्तुभाउ र वडाका सम्पूर्ण सडकहरु समेत छुट्याउने र उनीहरुको लागत राख्ने उद्देश्यले स्मार्ट कार्ड लागु गरिएको वडा अध्यक्ष दर्शन लामाले बताए ।

स्मार्ट कार्डबाट वडा वासीले स्थानिय तहबाट प्रदान गरिने ६४ वटा सेवा सुविधाहरुको सिफारिसलाइ समेत स्मार्टकार्डकै माध्यामबाट छिटो छरितो र सरल ढंगबाट प्रदान गर्ने गरी स्मार्ट कार्ड प्रदान गरिएको बताउदै अध्यक्ष लामाले वडाबाट प्रदान गरिने सिफारिस हातले भरि राख्न नपर्ने स्मार्ड कार्डको क्युआर कोर्ड स्क्यान गर्नासाथ प्रोफाइल आउने र कुन प्रकारको सेवा लिने हो त्यसमा गएर क्षणभरमै सिफारिस प्रदान गरिने भएकाले समयको सदुपयोग हुने बताए ।

सो अवसरमा स्मार्ट कार्डको जिम्मा पाएको मालिका सफ्टवेयर नेपालका प्रवन्ध निर्देशक सुरेश गिरीले ५ वर्ष वारेन्टी रहेको र कार्डमा वडामा बसोवास गर्नेको नागरिकताको प्रोफाइल र घरको विवरणलाई समावेश गरिएको र वडामा बस्ने ब्याक्ति कस्ले के गर्छ बार्षिक आम्दानी कति छ अध्ययन कति पेशा के गर्छ वैदेशिक रोजगारमा छ की छैन भन्ने सम्पूर्ण विवरण समेत रहने गरी प्रदान गरिने वताए । जसका लागी सुरुमा कार्ड लिने ब्याक्तिले सुरुमा सम्पूर्ण विवरणहरु भर्नुपर्ने बताए ।

सिस्टममा रहेपछि सेवाग्राहीले आफ्नो विवरणहरु थपघट गराउनका लागी पनि आग्रह गर्न सक्ने र तत्काल सेवाग्राहीको आग्रहलाई सुल्झाउने गरी प्राविधीकहरुले काम गर्ने वडाले जानकारी दिएको छ । २०६८ सालको जनगणना अनुसार १७ हजार ७७ जनसंख्या रहेको छ ।