काठमाडौं, १७ वैशाख । अमेरिकी राष्ट्रपति डोनाल्ड ट्रम्पका दक्षिण तथा मध्य एसिया मामिलाका विशेष दूत सर्जियो गोर बिहीबार साँझ तीनदिने भ्रमणका लागि काठमाडौं आइपुगेका छन्। तीनदिने भ्रमणका क्रममा उनले परराष्ट्रमन्त्री शिशिर खनाल र अर्थमन्त्री डा. स्वर्णिम वाग्लेसँग भेट्ने तय भए पनि प्रधानमन्त्री बालेन्द्र शाहसँग भेट्ने सम्भावना नरहेको परराष्ट्र मन्त्रालयले जानकारी दिएको छ।प्रधानमन्त्री शाहसँग भेटका लागि प्रस्ताव आए पनि कामको चापका कारण भेट्ने निश्चित नभएको प्रधानमन्त्रीका प्रेस तथा अनुसन्धान विज्ञ दीपा दाहालले जानकारी दिइन्। ‘प्रधानमन्त्रीज्यूको व्यस्तताका कारण भेट्ने समय मिलेको छैन,’ उनले भनिन्।विशेष दूत गोरले परराष्ट्रमन्त्री खनाल र अर्थमन्त्री वाग्लेसँग भेटसँगै सगरमाथा क्षेत्रको भ्रमणमा जाने कार्यक्रम भने तय भएको छ।

परराष्ट्र मन्त्रालयका प्रवक्ता लोकबहादुर क्षेत्रीले परराष्ट्रमन्त्री खनाल, अर्थमन्त्री वाग्ले, परराष्ट्रसचिव अमृतबहादुर राईसँग विशेष दूत गोरले भेट्ने कार्यक्रम तय भएको जानकारी दिए।प्रधानमन्त्री शाहले अहिलेसम्म कुनै पनि विदेशी कूटनीतिज्ञहरूसँग एक्लै भेट गरेका छैनन्। प्रधानमन्त्रीमा नियुक्तलगत्तै उनले नेपालमा रहेका विदेशी कूटनीतिज्ञहरूसँग सिंहदरबारमा सामूहिक भेट गरेका थिए। प्रधानमन्त्रीको यही नीतिका कारण उनले विशेष दूत गोरलाई भेट्ने सम्भावना नरहेको विशेष स्रोतले जानकारी दियो।यसअघि डेढ साताअघि नेपाल आएका अमेरिकी सहायक विदेशमन्त्री समिर पल कपुरले पनि प्रधानमन्त्री शाहसँग भेट्न पाएनन्। उनले पनि प्रधानमन्त्री शाहसँग भेटका लागि आग्रह गरेका थिए।गोर भारतका लागि अमेरिकी राजदूतसमेत हुन्। यस क्षेत्रका अमेरिकी राजदूतहरूले उनलाई रिपोर्ट गर्ने गर्छन्।३९ वर्षीय गोर ट्रम्पका निकट मानिन्छन्।गत चैत २७ मा राष्ट्रिय स्वतन्त्र पार्टीको नेतृत्वमा शक्तिशाली सरकार बनेपछि नेपाल आउन लागेका गोर अहिलेसम्मकै उच्च तहका कूटनीतिज्ञ हुन्। उनले चैत १२ गते रास्वपा सभापति रवि लामिछानेलाई फोन गरेर निर्वाचन सफलताका लागि बधाई दिएका थिए।