दैलेख, २४ कातिक । दैलेखकाे दुल्लूमा प्रहरी र स्थानीयवासीबीच झडप हुँदा दुर्इजना प्रहरी घाइते भएका छन् । ढुंगा लागेर इलाका प्रहरी कार्यालयका इञ्चार्ज प्रहरी निरीक्षक बजीरसिंह बिष्ट र प्रहरी सहायक निरीक्षक सुजन खड्कालाई टाउकोमा गम्भीर चोट लागेको छ ।
प्रहरी निरीक्षक बिष्टको टाउकोमा ४ वटा टाँका लगाइएको छ । प्रहरी सहायक निरीक्षक खड्काको चाहिँ ढाड र घाँटीमा भित्री चोट लागेको स्वास्थ्यकर्मीले बताएका छन् । प्रहरी र स्थानीयबीच दोहोरो झडपको स्थितिलाई नियन्त्रणमा लिन प्रहरीले २ राउण्ड हवाई फायर समेत गरेको दैलेखका प्रहरी इञ्चार्ज प्रहरी नायव उपरीक्षक ठाकुरप्रसाद पोखरेलले जानकारी दिनुभयो ।
बाटो नै अवरुद्ध गरी जुवा खेलिरहेको खबर पाएको आधारमा घटनास्थलमा पुग्दा दुल्लू नगरपालिका–७ का वडासदस्य सूर्यबहादुर थापाले युवाहरुलाई उक्साएर आक्रमण गरेकोे प्रहरीले आरोप लगाएको छ । ‘जनप्रतिनिधिले विकृति रोक्नुपर्नेमा उहाँले उक्साउनुभयो’, प्रहरी कर्मचारीले टिप्पणी गर्नुभयो ।
‘कौडा नियन्त्रण गर्न आएको प्रहरी टोलीले अपराधी पक्राउ गरेजसरी आक्रमक शैलीमा धरपकड गर्न थालेपछि मलाई नै पक्राउ गर्नुस् भनेर प्रतिवाद गरिरहेको बेला कौडा खेल्न र हेर्न आएका युवाहरुले ढुंगा प्रहार गरेछन्’, वडासदस्य थापाले बताए ।
घटनाबारे बुझ्न प्रमुख जिल्ला अधिकारी लक्ष्मी प्रसाद बास्कोटा र प्रहरी नायव उपरीक्षक ठाकुरप्रसाद पोखरेलको टोली बिहान त्यहाँ पुगेको छ । दुल्लू नगरपालिका नगरप्रमुख घनश्याम भण्डारीले घटनामा प्रहरी र स्थानीय समेत घाइते भएकोले छलफलबाट समस्या समाधान खोज्ने प्रयत्न भएको बताउनुभयो ।
घटनालार्इ नियन्त्रणमा लिन प्रहरीले लाठी चार्ज समेत गरेकाे थियाे । प्रहरीकाे लाठी चार्जबाट स्थानीयवासी ६१ वर्षका डिलबहादुर थापाकाे तिग्रामा चाेट लागेकाे थियाे । उपचारपछि उनी घर फर्केका छन् ।
प्रतिक्रिया दिनुहोस्