सिन्धुली, ६ कात्तिक । मोहन विक्रम थापा स्मृति खुला फुटबल प्रतियोगिता कात्तिक ८ गते बिहीबारदेखि भिमानमा सुरु हुने भएको छ । कुशल राजनीतित्र तथा समाजसेवी मोहन विक्रम थापाको सम्झनामा भिमान युवा क्लब तथा सिन्धुली ट्रष्ट नेपालले सो प्रतियोगिता आयोजना गरेको हो ।

सामाजिक अभियन्ता समेत रहनुभएका सिन्धुली ट्रष्ट नेपालका अध्यक्ष उज्ज्वल विक्रम थापाका अनुसार खेलको माध्यमबाट युवामा एकता र सहकार्यको भावना विकास गराउन सो प्रतियोगिताको आयोजना गरिएको हो ।

अध्यक्ष थापाले भन्नुभयो– ‘परिश्रम गरेर जित्ने एक माध्यम फुटबल प्रतियोगिता भएका कारण खेलप्रेमी युवाहरुको खेल प्रतिभालार्इ सम्बोधन गर्ने प्रयास गरेको हुँ ।’ स्वर्गबास भइसकेका आफन्तको सम्झनामा अनावश्यक खर्च भन्दा पनि सम्झनाको लागि समाजसेवा र युवा लक्षित कार्यक्रममा साथ दिन सके पितृआत्माको साँचो संबोधन हुने धारणा समेत उहाँले राख्नुभयो ।

गत वर्षदेखि नै भिमान युवा क्लबको सहकार्य तथा समाजसेवी थापाको पहलमा खुल्ला फुटबल प्रतियोगिता सञ्चालन हुँदै आएको छ ।

सो प्रतियोगिताको पुरस्कार राशी र सहभागिताका हिसावले प्रदेश ३ कै उत्कृष्ट प्रतियोगिताका रुपमा विकास हुँदै गएको छ । सो प्रतियोगिताका लागि समाजसेवी उज्ज्वल विक्रम थापाले गत वर्षदेखि पुरस्कार राशिको स्पोन्सर गर्दै आउनुभएको हो ।

प्रतियोगिताको प्रथम पुरस्कार एक लाख ५० हजार रुपियाँसहित शिल्ड, मेडल र प्रमाणपत्र रहेको छ । त्यस्तै, दोस्रो पुरस्कार राशि ५० हजार रुपियाँ, शिल्ड, मेडल र प्रमाणपत्र रहेको छ । प्रतियोगितामा उत्कृष्ट खेलाडी, अनुशासित टिम र म्यान अफ दी म्याचको अवार्डसमेत रहेको आयोजक क्लवले जनाएको छ । गत वर्ष प्रथम पुरस्कार ६० हजार र द्वितीय पुरस्कार ४० हजार रुपियाँ राशिको पुरस्कार व्यवस्था थियो । यस वर्ष पुरस्कार राशि बढाइएको छ । हाल सम्म १४ टिम समाबेश भइसकेको आयोजकले बताएको छ ।

कात्तिक ८ गतेदेखि सुरु हुने सो प्रतियोगिता भिमानस्थित जनजागृति माध्यमिक विद्यालयको खेल मैदानमा सञ्चालन हुने जनाइएको छ । प्रतियोगिताको खेल तालिका समेत सार्वजनिक गरिएको छ ।