काठमाडौं, १३ असोज । नेपाल कम्युनिष्ट पार्टी (नेकपा)का वरिष्ठ नेता माधवकुमार नेपालले स्थायी कमिटी सदस्यहरुलाई चियापानमा बोलाएर झुट कुरा बोलेको नेकपाका अन्य नेताहरुले दाबी गरेका छन् ।

नेता नेपालले प्रदेश कमिटी गठनबारे असन्तुष्टि जनाउँदै शुक्रबार स्थायी कमिटीका नेताहरुलाई बोलाएर चियापान गराउँदै प्रधानमन्त्री एवं पार्टी अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्डले प्रदेश कमिटीको नेतृत्व चयनमा एकलौटी गरेको गुनासो गरेका थिए । त्यसक्रममा नेता नेपालले आफुले पार्टी महासचिव विष्णु पौडेललाई यसबारेमा लिखित असहमति सहितको पत्र बुझाइसकेको बताएका थिए ।

तर, स्रोतका अनुसार महासचिव पौडेललाई नेता नेपालका सहयोगीले शनिबार बिहान मात्र पत्र पठाएका थिए । त्यसक्रममा पौडेलले नेपालको सबै कुरा शुक्रबारै दिउसो पत्रपत्रिका र अनलाइनबाट थाहा पाइसकेका हुनाले पत्र बुझ्न आवश्यक नरहेको प्रतिक्रिया दिएको स्रोतले दाबी गरेको छ ।

स्रोत भन्छ, ‘अन्य स्थायी कमिटी सदस्यहरुलाई आफुले शुक्रबारै असहमतिको पत्र बुझाएको भनेपनि शनिबार बिहान मात्र सहयोगी मार्फत पत्र पठाउनुबाटै नेता नेपालले झुट बोलेको प्रष्ट हुन्छ ।’

प्रदेश नेतृत्वबारे सचिवालयको निर्णय सार्वजनिक हुँदा वरिष्ठ नेता नेपाल अफ्रिकी मुलुक घानाको भ्रमणमा थिए । नेपालले आफ्नो अनुपस्थितिमा विधि र प्रक्रिया मिचेर प्रदेश इन्चार्ज, सहइन्चार्ज, अध्यक्ष र सचिव तोकिएको भन्दै असन्तुष्टि जनाए पनि यो प्रक्रियामा उनी स्वयं संलग्न भएको बताइएको छ ।

प्रधानमन्त्री निवास बालुवाटारमा सबै शिर्ष नेताहरु उपस्थित बैठकमा नेतृत्वबारे सहमति जुटेको पनि स्रोतले दाबी गरेको छ । बरु, नेपालले घाना जाने कार्यक्रमबारे पार्टी नेतृत्वलाई कुनै जानकारी नगराएको आरोप लागेको छ । पार्टी नेतृत्वलाई नसोधी विदेशमा हुने सानातिना कार्यक्रममा वरिष्ठ नेता नेपाल अल्झिन थालेको आरोप लागेको छ ।