काठमाडौं, २८ भाद्र । नेपाली कांग्रेसले निर्मला पन्तको बलात्कारपछि हत्या भएको विषयमा सरकारको भूमिका चित्तबुझ्दो नभएको भन्दै अवरुद्ध संसद गृहमन्त्रीले जवाफ दिने भएपछि खुलेको छ ।

संसदको वैठक शुरु हुनुभन्दा पहिले नै बोल्दै नेपाली कांग्रेसका सांसद दिलेन्द्रप्रसाद बडुले सरकारको अपराधी खोज्ने र सजाय दिने भुमिकाप्रति प्रश्न गरेका थिए । उनले यसको जवाफ प्राप्त नभएसम्म संसद अवरुद्ध गरेका थिए । त्यस्तै, बडुले पन्त प्रकरण राज्य संरक्षित अपराधमा परिणत हुँदै गएको आरोप लगाए।

सरकारको गम्भीर ध्यानाकर्षण गराउँदै बडुले निर्मला पन्तको घटना दिनानुदिन नाटकीय रुपमा रहस्यमय हुँदै गएको तर सरकार मुक दर्शक रहेको टिप्पणी गरे।
‘अनुसन्धान टोली परिर्वतन भइरहेको छ तर वास्तविक दोषी पत्ता लगाउनु भन्दा ढाक्नमा संलग्न देखिन थालेको छ, राज्य संरक्षित अपराधको स्वरुप लिन लागिरहेको आभाष हुन थालेको छ’, बडुले भने।

अनुसन्धान समितिका सदस्य वीरेन्द्र केसीले राजिनामाको घोषणा गरे फेरि फिर्ता लिएको प्रति पनि उनले संसदको ध्यानाकर्षण गराए। न्याय पाउने सम्भावना नदेखेको र यसमा शक्तिशाली व्यक्तिको संलग्नता रहेको टिप्पणी गरेको प्रति पनि बडुले सरकारको जवाफ माग गरेका छन् ।