दोलखा,१७ साउन । दोलखाको जिरीमा श्रीमतीको कुटाईबाट श्रीमानको मृत्यु भएको छ ।

जिरी नगरपालिका वडा नं । ३ मालीमा गए राती मादक पदार्थ सेवान गरि  आङलोमु शेर्पाले ५५ वर्षका  नाम्गेल शेर्पा माथि कुटपिट गर्दा उनको मृत्यु भएको स्थानीयहरुले बताएका छन ।

दुबै जनाले दिउँसो देखिनै मादक पदार्थ सेवान गरेको र बेलुका घरमा झगडा भएको मृतकका छिमेकीहरुले बताएका छन । प्राय संधै जसो जांड रक्सी सेवान गरेर झगडा भै रहने भएकाले छिमेकी ले समेत वास्त नगरेको र आज बिहान ८ बजे तिर मृतका श्रीमतीले छिमेकी ङिमा शेर्पालाई बुढा बिरामी छ छोरीलाई फोन लगाई दे भनेर आएको बताए ।

स्थानीय ङिमा शेर्पाको अनुसार फोन लगाई घरमा हेर्न जांदा नाम्गेल शेर्पा मृत अवस्थामा भेटेको र  छिमेकिलाई खबर गरेका थिए । त्यस लगत्तै वडा अध्यक्ष  नुर्वु शेर्पा र इलाका प्रहरी कार्यालय जिरीमा खबर गरेको स्थानीयहरुले बताएका छन ।

मृतक शेर्पाको सव पोस्टमार्टमको लागि दोलखा जिल्ला अस्पताल लगिएको छ भने श्रीमतीलाई इलाका प्रहरी कार्यालय जिरीले नियन्त्रणमा लिएको छ । उनलाई थप अनुसन्धानको लागि  आजै जिल्ला प्रहरी कार्यालय दोलखा लगिने दोलखा प्रहरीले बताएको छ ।

यधपी शेर्पाको मृत्यु कुटपिटकै कारणले भएको हो वा अन्य कुनै कारणले भएको हो भन्ने पोस्टमार्टम पछि को रिपोर्ट र प्रहरी अनुसन्धान पछि मात्र खुल्ने छ । शेर्पाको जेठो छोराको एक महिना अघि काठमाडौंमा मृत्यु अवस्थामा भेटिएका थिए ।  माईला र कान्छो छोरा हाल रोजगारको शिलसिलामा कोरीयामा छ्न ।