काठमाडौं, १४ फागुन । ​नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले कुनै पनि दलसँग तालमेल वा गठबन्धन नहुने बताएका छन्।

फागुन २१ गतेको निर्वाचनका सन्दर्भमा बिहीबार पार्टी कार्यालय पेरिसडाँडामा पत्रकार सम्मेलन गर्दै उनले विभिन्न दलहरूसँग तालमेलका विषयहरू बाहिरिएको भन्दै नेकपा तालमेल गर्नेपक्षमा नरहेको बताएका हुन्।तालमेलका लागि कुनै छलफल पनि नभएको उनको भनाइ छ।

‘म आज यो पत्रकार सम्मेलनमा एकचोटी फेरि स्पष्ट शब्दमा फेरि एकचोटी दोहोर्‍याउन चाहन्छु, हामी कसैसँग समीकरणमा छैनौँ, कुनै गठबन्धन वा केही ठाउँमा छोड्ने भन्ने पनि हाम्रो कतै छलफल भएको पनि छैन, हुने स्थिति पनि छैन’, रुकुम पूर्वबाट उम्मेदवारसमेत रहेका प्रचण्डले भने।नेकपाले बागलुङमा जनमोर्चासँग तालमेल गरेको छ। सोही ठाउँबाहेक अन्यत्र कतै पनि तालमेलको चर्चासमेत पार्टीमा नभएको उनले बताए।