काठमाडौं,२ साउन । काठमाडौं उपत्यकाको फोहोर सिसडोलमा खसाउन नसक्दा शहर दुर्गन्धमय बनेको छ । राजधानीका अधिकांशस्थानका फोहोर अझै उठाइएको छैन ।

फोहोरको रासमा माटो छापेर बनाइएको सडक भासिएपछि सिसडोलमा फोहोर व्यवस्थापन गर्न कठिनाई बनेको छ । हिजो डोजरको सहायताले फोहोर फ्यांकिए पनि समस्या उस्तै रहेको काठमाडौं महानगरपालिकाका कर्मचारीहरु बताउंछन् ।

पानी पर्न थालेपछि सिसडोलमा फोहोर बोकेर गएका कन्टेनर पुग्न सकेका छैनन् । राजधानीबाट फोहोर बोकेर गएका ट्रक फोहोर घोप्ट्याउन फोहोरको डंगुरमाथि छापिएको माटोमा गुड्नुपर्छ ।

पाँच दिन अघि फोहोर बोकेर ल्याण्ड फिल साइट पुगेका केही ट्रक भने काठमाडौं महानगरपालिकाको डोजरको साहायताले हिजो फोहोर फ्याँक्न सफल बनेका छन् ।

वर्षाको पानीले माटो बगाएको र फोहोर पनि गलेकाले यातायात अवरुद्ध भएको ल्यान्डफिल साइटमा कार्यरत काठमाडौं महानगरपालिकाका कर्मचारीको भनाई छ । सरकारले तीन वर्षको लागि भनेर निर्माण गरिएका ल्याण्डफिल साइटको विकल्प १४ वर्षसम्म पनि खोज्न सकेको छैन । पानीले हिलो बनाएपछि फोहोर बोकेर गएका गाडी जान सकेका छैनन् ।