काठमाडौँ,४ असार । नेपाली कांग्रेसकी नेतृ सुजाता कोराइलाले शेरबहादुर देउवाको नेतृत्व असफल भएको दाबी गरेकी छिन । उनले देउवाको कारण पार्टी कमजोरी भएको भन्दै उनको नेतृत्व कमजोर भएको दाबी गरेकी हुन ।

सोमबार रिपोर्टर्स क्लबको साक्षात्कारमा कोइरालाले चुनावमा पार्टीले पराजय भोग्दैमा नेतृत्वले राजीनामा दिनु नपर्ने तर, पराजयको जिम्मेवारी लिनु पर्ने बताइन् । पछिल्लो समय कांग्रेसको संगठन केन्द्रदेखि गांउसम्म ध्वस्त भएको र सक्षम र राम्रा मान्छेलाई भन्दा आफ्ना मान्छेलाई काखी च्याप्ने गरेको गुनासो पोखिन् ।

गाउँ–गाउँमा सक्षम कार्यकर्ता छन्, सुतेर बसेकालाई जगाउन सक्ने हो भने कांग्रेस बलियो हुने उनले बताइन ।

महासमितिको बैठकपछि महाधिवेशनको यात्रा तय गर्नुपर्ने भन्दै उनले जसले विपीको सिद्धान्त अंगाल्न सक्छ, उसैलाई पार्टीको नेतृत्वमा ल्याउनुपर्ने बताइन् । पार्टीभित्रका सबै समस्या समाधान गर्न सक्ने सक्षम नेतृत्व अबको आवश्यकता रहेको उनको भनाइ छ ।