कैलाली,३ असार । कैलालीको भजनी नगरपालीका–३ ठेकीपुर र वडा नम्बर ५ लालबोझी र ७ चर्चालाई जोड्ने कान्द्रा नदीको पुलको ठेक्का सम्झौता भएको ७ वर्ष पूरा हुँदा एउटा पिल्लर हाल्ने काम समेत भएको छैन ।

२ वर्ष सम्मको लाग ठेक्का लिएको काम सात वर्ष पुग्दा पनि सम्पन्न भएको छैन । ०६८ जेठ ३१ गतेदेखि काम सुरु गरेको लामा शेर्पा जेभी प्रालिले ०७० मंसिर मसान्तसम्ममा पुलको काम सम्पन्न गरिसक्नु पर्ने हो ।

तर, बिभागबाट पटकपटक म्याद थप गरेपनि ठेकेदारले अहिलेसम्म पुलको २५ प्रतिशत काम मात्रै सम्पन्न गरेको आयोजनाले जानकारी दिएको छ । एकसय मिटर लम्बाईको पुल बनाउने ठेक्का पाएको लामा सेर्पा जेभीले सम्झौता भएकोे ७ बर्ष सम्म पनि पुलको काम अलपत्र बनाईदा खोलापारी कष्टकर जिवन विताईरहेका छन  ।

स्थानियहरुलाई समस्या त छ नै आशा मात्रै देखाएर काम नगर्ने ठेकेदारलाई कारवाही नहुँदा फेरी म्याद थप गरेर पुलको काम अलपत्र छोड्ने त होईन भन्ने समस्याले झनै पिरोलेको छ । निर्माण सम्झौता भएकोे ७ वर्षसम्म सम्बन्धित निकाय अनुगमनमा समेत नआएको स्थानीय मानबहादुर चुनाराले बताए ।

उनले ठेक्का लिएको ठेकेदार विकास कुमार झा समेत यहाँ नआएको बताए । पुल निर्माणका लागि निर्माण सामाग्री पनि वर्षात शुरु हुने बेलामात्रै ल्याउने गरेको बताउदै अहिले पनि जेठ २० गते मात्रै पुलका लागि छड लिएर आएको उनले बताए । नदिमा पुल नहुँदा सबैभन्दा बढी मार विद्यार्थीहरुलाई पर्ने गरेको स्थानिय शिक्षक मानबहादुर साउँदले बताए ।