काठमाडौं, ६ वैशाख। सेन्डिकेट विरुद्ध सरकार कडा रुपमा प्रस्तुत हुने थालेपछि समितिहरु गुपचुप रुपमा कम्पनीमा दर्ता प्रक्रियामा आउन थालेका छन् । कम्पनीमा जानैपर्ने भएकाले उनीहरु कानुनी परामर्शमा जुटेका छन् ।
केही समितिले कम्पनी रजिष्ट्रारको कार्यालयमा नाम ‘रिजर्भ’ गरिसकेका एक स्रोतले जानकारी दिएको छ । त्यसमध्येको एक हो, अरनिको यातायात सेवा समिति । सरकारले अरनिको राजमार्गमा कायम सिन्डिकेट तोडेपछि समिति कम्पनी रजिष्ट्रारको कार्याल पुगेको छ ।
घोषित आन्दोलनलाई समर्थन गरेको र नेपाल यातायात व्यवसायी राष्ट्रिय महासंघले भनेपछि मात्रै कम्पनीमा दर्ता हुने समितिका अध्यक्ष श्याम लामाले बताएका छन् । ‘तत्कालै कम्पनीमा जाने होइन, महासंघले भन्यो भने मात्रै हामी जाने हो,’ उनले भने, ‘पहिले आन्दोलनमा होमिन्छौं । भएन भने विकल्प सोच्नुपर्छ ।’ यता कम्पनी रजिष्ट्रारको कार्यालय स्रोतकाअनुसार अरनिको यातायातले कम्पनीका लागि नाम ओगटेको छ । यो समितिसँग हाल ६५० भन्दा बढी गाडी आवद्ध छन् ।
सबै समितिलाई कम्पनीमा जानैपर्ने बाध्यकारी स्थिति आए आफ्नो नाम अरुले खोस्ने डर व्यवसायीलाई छ ।
समितिका पदाधिकारी पनि पनि नाम रिजर्भ गर्न कार्यालयमा पुग्न थालेका छन् । कम्पनी रजिष्ट्रारको कार्यालयका एक कर्मचारीका अनुसार व्यवसायीहरु दर्ता प्रक्रिया बुझ्न र नाम रिजर्भ गर्न आउन थालेका छन् ।
नियमअनुसार कुनै नाम ओगटेको ३५ दिनभित्र कम्पनीको प्रवन्धपत्रसहित कागजात रजिष्ट्रारको कार्यालयमा पेश गर्नुपर्छ । यो समय सीमाभित्र विधानसहितका कागजात पेश नभए रिजर्भ भएको नाम अन्यले पनि लिन पाउँछन् । कार्यालयका कानुन शाखा हेर्ने उपरजिष्ट्रार राजेन्द्र थापा यातायात व्यवसायीहरु कम्पनी दर्ताको कानुनी प्रक्रिया बुझ्न आउन थाल्नु सुखद् भएको बताउँछन् । अब यातायात समितिहरु पनि कम्पनी दर्तामा आउने संकेत मिलेको उनको भनाइ छ ।
‘ठूला समितिका व्यवसायी आइसक्नु भएको छैन । तर, साना व्यवसायीहरु भने दर्ता गरिसकेको कम्पनी कसरी चलाउने, के(के प्रक्रिया छन् भन्ने बुझ्न आउन थाल्नुभएको छ,’ उनले भने, ‘विस्तारै यातायात कम्पनी दर्ता हुने क्रम बढ्ने अपेक्षा छ ।’
कम्पनीका रुपमा दर्ता भएर यातायात व्यवस्था विभागमा सय वटा पनि कम्पनी पञ्जीकरण भएका छैनन् । ठूलो व्यवसायका रुपमा चिनिएको यातायात क्षेत्र संघरसमितिकै नाममा चलिरहेको छ । तर, सरकारले सिन्डिकेटविरुद्ध कडा कदम चालेपछि व्यवसायीले बाध्य भएर कम्पनीको बाटो रोज्न सुरु गरेका छन् ।
प्रतिक्रिया दिनुहोस्