जनकपुरधाम, २७ चैत । प्रदेश नं २ का आन्तरिक मामिला तथा काूननमन्त्री ज्ञानेन्द्रकुमार यादवले भौतिक पूर्वाधारमन्त्री जितेन्द्रप्रसाद सोनारलाई ज्यान मार्ने धम्की आएकामा प्रदेश सरकार गम्भीर भएको बताउनुभएको छ ।

आज बसेको प्रदेशसभा बैठकमा प्रदेशको शान्ति सुरक्षाका सम्बन्धमा जानकारी गराउँदै उहाँले पूर्वाधारमन्त्री सोनारलाई विशेष सुरक्षा प्रदान गरिने जानकारी दिनुभयो ।

प्रदेशसभा सदस्य मनिषकुमार सुमनले प्रदेशसभाको अघिल्लो बैठकमा भौतिक पूर्वाधारमन्त्री सोनार सप्तरीमा सरसफाइ कार्यक्रममा सहभागी भएको बेला सशस्त्र समूहबाट ज्यान मार्ने धम्की आएको जानकारी गराउनुभएको थियो ।

मन्त्री यादवले मन्त्री सोनारबाट लिखित रूपमा जानकारी आएपछि यसबारे सघन रूपले कारबाहीको प्रक्रिया अगाडि बढाइने बताउनुभयो ।

प्रदेश प्रहरी ऐन नभएका कारण पनि सुरक्षा र प्रशासनिक निकायबीच समन्वयमा समस्या देखिएको उल्लेख गर्दै उहाँले बम विस्फोट, महिला हिंसा, बलात्कार जस्ता घटनाको नियन्त्रणका लागि सरकारको मुख मात्र ताक्ने प्रवृत्तिको अन्त्य गर्नुपर्नेमा जोड दिनुभयो ।

मन्त्री यादवले सरकार शान्ति सुरक्षा भरपर्दो बनाउनेतर्फ प्रयासरत रहेको जानकारी पनि दिनुभयो ।