काठमाडौं, २७ चैत । मेलम्ची खानेपानी आयोजनाको सिन्धु–ग्याल्थुम खण्डको अन्तिम ‘ब्रेक थ्रु’ गर्ने काम सकिएको छ । यो सँगै २६ किलोमिटर सुरुङ खन्ने काम पनि सकिएको छ ।

मेलम्ची खानेपानी आयोजनाले पत्रकार सम्मेलन गर्दै ब्रेक थ्रु गर्ने काम सकिएको र मुख्य संरचना, भेट साफ्ट तथा सुरुङको केही काम बाँकी रहेको जानकारी दिएको छ ।

सन २००८ मा सुरु भएको यो आयोजना आउने जुनसम्ममा सकिने भएको छ । यो आयोजना सकिएसँगै उपत्यकामा १७ करोड लिटर पानी आउने छ ।

बिहीबार प्रधानमन्त्री, पूर्व प्रधानमन्त्री तथा मन्त्रीहरुको उपस्थितिमा विशेष कार्यक्रम आयोजना गरेर मेलम्ची खानेपानी आयोजनाका निर्देशक रामचन्द्र देवकोटाले जानकारी दिनुभयो । उहाँले सुरुङमा गरिएको अन्तिम ब्लाष्टको खबर भर्खरै आएको पनि बताउनुभयो । उहाँले मेलम्ची आयोजना सम्पन्न भएकोमा देशले नै उत्सव मनाउने गरी खुशीयाली छाएको बताउनुभयो ।

खानेपानी तथा सरसफाई मन्त्री बिना मगरले मेलम्ची खानेपानी आयोजना सम्पन्न हुनु ठूलो उपलब्धि र उत्साह भएको बताउँदै दसैँ अगावै उपत्यकावासीलाई पानी उपलब्ध गराउनु आफ्नो प्रमुख कार्यभार भएको बताउनुभयो ।