काठमाडौं ५ असार ।यस वर्ष कक्षा १२ को नतिजामा उत्तीर्ण हुने विद्यार्थीको संख्या उल्लेख्य रूपमा बढेको छ। राष्ट्रिय परीक्षा बोर्डका अनुसार नियमिततर्फ ६९.७५ प्रतिशत विद्यार्थी उत्तीर्ण भएका छन्, जुन अघिल्ला वर्षहरूको तुलनामा उच्च हो। गत वर्ष ५२.९१ प्रतिशत र त्यसअघिको वर्ष ५१.९१ प्रतिशत विद्यार्थी मात्र उत्तीर्ण भएका थिए। २०७९ सालमा उत्तीर्ण प्रतिशत ४८.१ मा सीमित रहेको थियो। यस वर्षको नतिजाले पछिल्ला वर्षहरूको तुलनामा सुधार भएको संकेत गरेको छ।

यस वर्ष नियमिततर्फ ३ लाख ३२ हजार २४१ जना विद्यार्थी परीक्षामा सहभागी भएकामध्ये २ लाख ३१ हजार ७७० जना उत्तीर्ण भएका छन्। त्यसैगरी, आंशिकतर्फ ८५ हजार ९२९ जना विद्यार्थीले परीक्षा दिएकोमा ३६ हजार ४२० जना उत्तीर्ण भएका छन्।

नियमित र आंशिक दुवैतर्फ गरी कुल ४ लाख १८ हजार १७० जना विद्यार्थी परीक्षामा सहभागी भएका थिए। तीमध्ये २ लाख ६८ हजार १९० जना उत्तीर्ण भएको बोर्डले जनाएको छ। साथै, परीक्षाको मर्यादा उल्लङ्घन गरेको आरोपमा ४० जना विद्यार्थीको परीक्षा रद्द गरिएको छ।

बोर्डका अनुसार विद्यार्थीहरूले आफ्नो नतिजा राष्ट्रिय परीक्षा बोर्डको वेबसाइट तथा नेपाल टेलिकमको वेबसाइटमार्फत हेर्न सक्नेछन्। साथै, मोबाइलबाट NEB टाइप गरी एक स्पेस दिएर आफ्नो सिम्बोल नम्बर लेखी १६०० मा एसएमएस पठाएर पनि नतिजा प्राप्त गर्न सकिन्छ।

त्यसैगरी, १६०१ नम्बरमा डायल गरेर वा *१६०१# डायल गरी पनि नतिजा थाहा पाउन सकिने बोर्डले जनाएको छ।