काठमाडौं २२ जेष्ठ । भारत सरकारले हवाई इन्धन (एटीएफ) को मूल्यमा भएको वृद्धिको प्रभाव न्युनिकरण गर्न तेल मार्केटिङ कम्पनीहरू (ओएमसी) का लागि १०० अर्ब भारतीय रुपैयाँ (करिव १.०४ अर्ब अमेरिकी डलर) को विशेष बजेटरी सहयोग स्वीकृत गरेको छ । सङ्घीय मन्त्रिपरिषद्को बैठकले विमानसेवा कम्पनीहरूलाई इन्धनको मूल्य वृद्धिबाट जोगाउन र बजार सन्तुलन कायम राख्न यो प्राइस स्टेबलाइजेसन फण्ड (मूल्य स्थिरता कोष) को व्यवस्था गरेको हो । मध्यपूर्वमा जारी सङ्कटका कारण अन्तर्राष्ट्रिय बजारमा इन्धनको मूल्य बढेपछि लामो दूरीका हवाई उडानको भाडामा उल्लेख्य वृद्धि भएको थियो। भाडा वृद्धिसँगै अन्तर्राष्ट्रिय मागमा आएको गिरावटका कारण धेरै भारतीय विमानसेवा कम्पनीहरूले आफ्ना उडानहरू कटौती वा स्थगित गर्नुपर्ने अवस्था सिर्जना भएको थियो । मन्त्रिपरिषद्को आधिकारिक विज्ञप्तिअनुसार, सरकारले प्रदान गर्ने यो बजेटरी सहयोग तेल विपणन कम्पनीहरूलाई ब्याजमुक्त पेश्कीका रूपमा उपलब्ध गराइनेछ। यस सहयोगको मुख्य उद्देश्य हवाई इन्धनको मूल्यलाई स्थिर राखी विमानसेवा कम्पनीहरूलाई सहुलियत प्रदान गर्नु हो । यो योजना आन्तरिक र अन्तर्राष्ट्रिय दुवै क्षेत्रमा उडान भर्ने इच्छुक सबै भारतीय विमानसेवा प्रदायकहरूका लागि खुला रहने सरकारले जनाएको छ । यस कदमबाट भारतीय उड्डयन क्षेत्रले व्यहोर्दै आएको आर्थिक दबाब कम हुने अपेक्षा गरिएको छ ।