काठमाडौं २२ जेष्ठ । बिहीवार बिहान गाजा शहरका विभिन्न आवासीय क्षेत्रहरूलाई लक्षित गरी इजरायलले गरेको श्रृंखलाबद्ध हवाई आक्रमणमा नौ जना प्यालेस्टिनीको मृत्यु भएको छ भने अन्य थुप्रै घाइते भएका छन् । चिकित्सा स्रोत र प्रत्यक्षदर्शीहरूका अनुसार इजरायली सेनाले शहरका उत्तरी र पश्चिमी भेगमा रहेका आवासीय भवन तथा अपार्टमेन्टहरूलाई निशाना बनाएको हो । गाजा शहरस्थित अल–शिफा मेडिकल कम्प्लेक्सका चिकित्सा अधिकारीहरूले दिएको जानकारीअनुसार आक्रमणमा परी मृत्यु हुनेको संख्या कम्तीमा नौ पुगेको छ । घाइतेहरूको अवस्था गम्भीर रहेको र उद्धारकर्मीहरूले भत्किएका संरचनाका भग्नावशेषमुनि पुरिएका बेपत्ता व्यक्तिहरूको खोजी कार्य जारी राखेको बताइएको छ । गाजा नागरिक रक्षाका प्रवक्ता महमुद बासलले उद्धार टोलीहरूले बिहीवार बिहानैदेखि गाजा शहरका विभिन्न स्थानमा सञ्चालन भइरहेको खोजी तथा उद्धार कार्यमा संलग्न रहेको पुष्टि गर्नुभयो । उहाँले भग्नावशेषबाट कैयौँ शव र घाइतेहरू निकालिएको भए तापनि अझै केही व्यक्तिहरू हराइरहेको जानकारी दिनुभयो । प्रवक्ता बासलकाअनुसार व्यापक विनाश, भारी उपकरणको अभाव र इन्धनको चरम संकटका कारण उद्धार कार्यमा निकै कठिनाइ भइरहेको छ । यसैबीच, स्थानीय स्रोतहरूका अनुसार इजरायली सेनाले गाजा पट्टीको उत्तरी र दक्षिणी क्षेत्रमा भौतिक संरचनाहरू भत्काउने कार्यलाई पनि तिब्रता दिएको छ । दक्षिणी गाजाको खान युनिसको पूर्वी भागमा तोपबारी र गोलीबारीका बीच कम्तीमा १० वटा भवनहरू ध्वस्त पारिएको समाचार प्राप्त भएको छ । त्यस्तै, गाजा शहरको पूर्वी टोलहरूमा पनि इजरायली सेनाले भवनहरू भत्काएको प्रत्यक्षदर्शीहरूले बताएका छन् । 
हालसम्म इजरायली सेनाले यी पछिल्ला सैन्य कारबाहीका सम्बन्धमा कुनै पनि आधिकारिक प्रतिक्रिया दिएको छैन ।