काठमाडौं । राष्ट्रिय प्रजातन्त्र पार्टी (राप्रपा) का महामन्त्री धवल शम्शेर राणासहित १८३ जना नेता तथा कार्यकर्ताले पार्टी परित्यागको घोषणा गरेका छन्।

पार्टी छाड्नेहरूमा काठमाडौं उपत्यकामा उपलब्ध केन्द्रीय पदाधिकारी, केन्द्रीय सदस्य, जनवर्गीय संगठनका पदाधिकारी तथा सदस्यहरू रहेका छन्। उनीहरूले संयुक्त रूपमा राप्रपासँगको आफ्नो राजनीतिक सम्बन्ध अन्त्य गरेको घोषणा गरेका हुन्।

पार्टी परित्याग गर्ने प्रमुख नेताहरूमा उपाध्यक्ष मुकुन्द श्याम गिरी, महामन्त्री धवल शम्शेर राणा, दिलनाथ गिरी, केशवराज श्रेष्ठ, नारायणप्रसाद कोइराला, सगुनसुन्दर लावती, धनसुर शाही, मीना शाही, दिलविकास राजभण्डारी र नानीमैया आचार्यलगायत रहेका छन्।

उल्लेखित अधिकांश नेताहरूलाई राप्रपा अध्यक्ष राजेन्द्र लिङ्देन नेतृत्वले यसअघि पार्टी अनुशासन उल्लंघन गरेको आरोपमा कारबाही गरेको थियो।

पार्टी परित्यागसँगै धवल शम्शेर राणाले नयाँ राजनीतिक दल गठन गर्ने तयारी अघि बढाएको स्रोतहरूले बताएका छन्। राणाको नेतृत्वमा नयाँ राजनीतिक शक्ति निर्माणको प्रयास भइरहेको चर्चा राजनीतिक वृत्तमा सुरु भएको छ।

राप्रपाभित्र लामो समयदेखि देखिएको आन्तरिक विवाद र नेतृत्वबीचको मतभेदकै परिणामस्वरूप यो समूहले पार्टी छाड्ने निर्णय गरेको विश्लेषण गरिएको छ।