काठमाडौं २१ जेष्ठ । रोल्पाको माडी गाउँपालिका–२ व्याङखोलामा आज बिहान भएको सवारी दुर्घटनामा तीन जनाको मृत्यु भएको छ।
जिल्ला प्रहरी कार्यालय रोल्पाका सूचना अधिकारी इन्सपेक्टर कृष्ण श्रेष्ठका अनुसार दुर्घटनामा एक महिला र दुई पुरुषको ज्यान गएको हो। मृतकहरूको पहिचान हालसम्म खुल्न सकेको छैन।
प्रहरीका अनुसार पिकअप गाडी सडकबाट करिब ४ देखि ५ सय मिटर तल खसेको अवस्थामा फेला परेको छ। दुर्घटनाको जानकारी बिहान करिब ९ बजेतिर प्राप्त भएपछि इलाका प्रहरी कार्यालय घर्तिगाउँबाट प्रहरी टोली घटनास्थलमा पुगेको थियो।
इन्सपेक्टर श्रेष्ठले घटनास्थलमा पुगेको प्रारम्भिक टोलीले तीन जनाको मृत्यु भएको पुष्टि गरेको बताए। गाडीको नम्बर प्लेटसमेत अझै पहिचान हुन बाँकी रहेको प्रहरीले जनाएको छ।
दुर्घटनाको कारणबारे थप अनुसन्धान भइरहेको प्रहरीले जनाएको छ।
प्रतिक्रिया दिनुहोस्