काठमाडौं २० जेष्ठ । अमेरिकाले स्ट्रेट अफ होर्मुज क्षेत्रमा आफ्नो नौसैनिक नाकाबन्दी अभियानअन्तर्गत इरानतर्फ जाँदै गरेको एउटा खाली तेल ट्यांकरमाथि क्षेप्यास्त्र प्रहार गरेको छ।

अमेरिकी केन्द्रीय कमाण्ड (सेन्टकम) का अनुसार बोत्सवानाको झण्डावाहक एम/टी लेक्सी नामक ट्यांकरले २४ घण्टासम्म दिइएका पटक–पटकका चेतावनी र निर्देशनलाई बेवास्ता गरेपछि अमेरिकी विमानले जहाजको इन्जिन कक्षमा हेलफायर क्षेप्यास्त्र प्रहार गरेको हो। आक्रमणपछि जहाज सञ्चालन गर्न नसक्ने अवस्थामा पुगेको सेन्टकमले जनाएको छ।

मंगलबार सार्वजनिक गरिएको भिडियोमा अमेरिकी सेनाले ट्यांकरमाथि आक्रमण गरेको दृश्यसमेत देखाइएको छ। उक्त जहाज अन्तर्राष्ट्रिय जलक्षेत्र हुँदै इरानको खार्ग टापुतर्फ गइरहेको अमेरिकी दाबी छ। घटनाबारे इरानले हालसम्म औपचारिक प्रतिक्रिया दिएको छैन।

सेन्टकमका अनुसार अमेरिकाले अप्रिल १३ देखि इरानी बन्दरगाहमा प्रवेश गर्ने वा त्यहाँबाट बाहिरिने जहाजमाथि नाकाबन्दी लागू गर्दै आएको छ। नाकाबन्दी सुरु भएयता ६ वटा व्यावसायिक जहाजलाई सञ्चालन गर्न नसक्ने अवस्थामा पुर्‍याइएको तथा १२२ वटा जहाजलाई आफ्नो मार्ग परिवर्तन गर्न बाध्य बनाइएको दाबी गरिएको छ।

स्ट्रेट अफ होर्मुज क्षेत्रमा अमेरिका र इरानबीचको तनाव चर्किरहेका बेला भएको यो घटनाले अन्तर्राष्ट्रिय समुद्री सुरक्षाबारे थप चिन्ता बढाएको छ।