काठमाडौं, ८ जेठ । प्रतिनिधिसभाअन्तर्गतको राज्यव्यवस्था तथा सुशासन समितिको बैठक बन्द कोठामा गरिएपछि केही सांसदहरूले विरोध जनाएका छन् ।

शुक्रबार समितिको बैठकको एजेन्डा बनेपास्थित सुकुम्वासी होल्डिङ सेन्टरको अनुगमनबाट देखिएका विषयमा पूर्वधार विकास मन्त्रालयसँग छलफल थियो ।

पत्रकारहरूलाई बैठक सुरु भएपछि फोटो खिच्न दिएर बाहिर निकालियो । छलफलमा केही बरे बसेर मन्त्री सुनिल लम्साल पनि निस्किए । बन्द कोठाको बैठक र मन्त्रीबिनाको छलफलमा नबस्ने भन्दै सांसदहरूले बैठक बहिष्कार गरेका हुन् । जसमा नेपाली कांग्रेसका सचेतक निश्कल राई, एमालेका सांसद मोहमद इस्तियाक राई र सत्तारूढ रास्वपाका सांसद अमरेश सिंह छन् । कांग्रेस प्रमुख सचेतक राईले क्रमभंगताका नाममा लोकतन्त्रलाई बन्धक बनाउन खोजेको बताए । बन्द कोठामा गर्ने भए उपस्थित नहुने चेतावनी सांसदहरूको छ ।

“सार्वभौम जनताको आवाज बोकेर जनप्रतिनिधि मिनि पार्लियामेन्ट गएका हौँ । जनप्रतिनिधिलाई प्रत्यक्ष सुन्न पाउने अधिकार जनतामा रहन्छ । प्रेसलाई बाहिर राखेर बैठक चलाइयो । सबै क्रमभंगतका नाममा लोकतन्त्रलाई बन्धक बनाउने ? यसरी नै बैठक चल्यो भने हामी उपस्थित हुँदैनौँ भनेका छौँ,” उनी भन्छन् । बैठकमा कांग्रेस सांसद अजुर्ननरसिंह केसीले पनि सोही विषयमा धारणा राखेका थिए । र, उनी पनि निस्किए । “बैठकमा मन्त्री चाहियो नि । जवाफ कर्मचारीबाट खोजेको होइन । हामीले निर्देशन दिने कुरा हो,” राई भन्छन्, “पहिले मन्त्री हुनुहुन्थ्यो । तर, पछाडिको एजेन्डामा बस्नु भएन ।” बजेटको बेलामा व्यस्तता भन्दै मन्त्री निस्किएका थिए । “व्यस्तता थियो बैठक अर्को दिन राखेको भए हुन्थ्यो नि,” बैठकमा सांसदहरूले भनेका छन् ।