काठमाडौं, ८ जेठ । काठमाडौं महानगरपालिका–८ पिंगलास्थानमा रहेको ‘हाम्रो डिजिटल स्टुडियो’का सञ्चालकलाई अपहरण गरी फिरौती असुल गरिएको घटना सार्वजनिक भएको छ।

रुपन्देही सियारी गाउँपालिका–५ घर भई लामो समयदेखि पिंगलास्थानमा स्टुडियो सञ्चालन गर्दै आएका ६० वर्षीय विष्णु न्यौपाने लाई ४ वैशाखको साँझ एक समूहले अपहरण गरी कुटपिट गर्दै रकम असुल गरेको प्रहरीले जनाएको छ।

प्रहरीका अनुसार स्टुडियोमा प्रवेश गरेको समूहले सुरुमा करिब २ लाख रुपैयाँ नगद लुटपाट गरेको थियो। त्यसपछि उनलाई नियन्त्रणमा लिएर बागमती करिडोर हुँदै निलोपुलसम्म लगिएको बताइएको छ।

त्यसपछि अपहरणकारीहरूले ठूलो रकम माग गरे पनि अन्ततः ५० हजार रुपैयाँ फिरौती लिएर पीडितलाई छाडेको अनुसन्धानबाट खुलेको छ।

घटनापछि पीडितले प्रहरी वृत्त गौशालामा उजुरी दिएका थिए। त्यसपछि प्रहरीले २४ घण्टाभित्रै घटनामा संलग्न दुई जनालाई पक्राउ गरेको जनाएको छ।

पक्राउ पर्नेमा धनकुटा घर भई काठमाडौँ बस्दै आएका योगेन्द्र पौडेल र धनुषा घर भई काठमाडौँ बस्दै आएका रवीन कोइराला रहेका छन्।

प्रहरीका अनुसार पक्राउ परेकाहरूले वैदेशिक रोजगार तथा विभिन्न संस्थाको नाममा परिचयपत्र देखाएर ‘उद्धार’को नाममा ठगी गर्दै आएका थिए। उनीहरूले विदेशमा अलपत्र परेकाहरूका आफन्तसँग रकम असुल्ने र दोहोरो ठगी गर्ने गरेको प्रारम्भिक अनुसन्धानमा देखिएको छ।

दुवै अभियुक्तको साथबाट मन्त्रालय तथा विभिन्न संस्थाका परिचयपत्र, चेकबुक, नगद रकम र मोबाइल फोन बरामद गरिएको प्रहरीले जनाएको छ।

प्रहरीले उनीहरू यसअघि पनि ठगी तथा अवैध आर्थिक गतिविधिमा संलग्न रहेको देखिएको भन्दै थप अनुसन्धान जारी रहेको जनाएको छ।