आन्तरिक र बाह्य कारकलाई मुख्य जिम्मेवार ठहर्याउँदै १६५ क्षेत्रीय समितिलाई प्रतिवेदन बुझाउन निर्देशन

काठमाडौँ । फागुन २१ मा सम्पन्न प्रतिनिधिसभा निर्वाचनमा अपेक्षाभन्दा अत्यन्त कमजोर नतिजा आएपछि नेपाली कम्युनिस्ट पार्टी (नेकपा) ले हारका लागि आन्तरिक र बाह्य दुई प्रमुख कारण जिम्मेवार रहेको निष्कर्ष निकालेको छ ।

बिहीबार पेरिसडाँडास्थित केन्द्रीय कार्यालयमा बसेको केन्द्रीय कार्य संयोजन समितिको बैठकमा पार्टी नेतृत्वले यो विश्लेषण प्रस्तुत गरेको हो । साबिक नेकपा माओवादी केन्द्र, नेकपा एकीकृत समाजवादी लगायत २५ वटा वाम घटक मिलेर बनेको नेकपाले चुनावअघि आफूलाई निर्णायक शक्ति बनाउने आन्तरिक अनुमान गरेको थियो । तर प्रत्यक्षतर्फ र समानुपातिकतर्फ गरी जम्मा १७ सिट मात्र जितेपछि पार्टीले गम्भीर समीक्षा सुरु गरेको छ ।

आन्तरिक कारणहरू

बैठकमा प्रस्तुत गरिएको प्रारम्भिक प्रतिवेदनमा आन्तरिक कमजोरीलाई मुख्य जिम्मेवार ठहर गर्दै निम्न कारणहरू औंल्याइएको छ :

• क्रान्तिपछि आर्थिक तथा सामाजिक रूपान्तरण हुन नसक्नु
• संगठनात्मक समायोजन नहुनु
• विचारधारात्मक काम र प्रशिक्षणको कमी
• युवाहरू पार्टीमा आकर्षित नहुनु
• वाम शक्तिहरूबीच एकता कायम नहुनु
• परिवर्तनको उपलब्धि जनतालाई बुझाउन नसक्नु
• भएका कामको प्रभावकारी प्रचार प्रसार नहुनु
• सिद्धान्त र व्यवहारबीचको ठूलो अन्तर
• अवसरवादी र व्यक्तिवादी कार्यशैली
• प्राविधिक जनशक्ति र स्रोत-साधनको अभाव
• जनतासामु विकल्पको रूपमा प्रस्तुत हुन नसक्नु

बाह्य कारणहरू

पार्टीले बाह्य कारकलाई पनि उत्तिकै महत्व दिएको छ । जसमा :

• पुराना दलविरोधी अभियान
• वाम शक्तिमाथि निरन्तर प्रहार
• भूराजनीतिक स्वार्थ र बाह्य शक्ति केन्द्रको चलखेल
• डिजिटल सुनामी (सामाजिक सञ्जालको प्रभाव)
• लोकप्रियतावादी शक्तिको तीव्र प्रचार
• विदेशमा बस्ने नेपालीको भूमिका

रहेका छन् ।

क्षेत्रीय समितिलाई निर्देशन

निर्वाचन परिचालन समितिले फागुन २८ मा प्रारम्भिक समीक्षा गरेको थियो । बैठकले अब १६५ वटै निर्वाचन क्षेत्रका समितिलाई चुनावी हारको ठोस कारणसहितको प्रतिवेदन बुझाउन निर्देशन दिएको छ ।

नेकपाले यी प्रतिवेदनको आधारमा थप गहन छलफल गरी पार्टीको भावी रणनीति तय गर्ने बताएको छ ।