काठमाडौं । भारतीय प्रधानमन्त्री नरेन्द्र मोदीले नेपालमा सफलतापूर्वक र शान्तिपूर्ण रूपमा सम्पन्न भएको निर्वाचनका लागि नेपाल सरकार र नेपाली जनतालाई बधाई दिएका छन्।

सामाजिक सञ्जालमार्फत सन्देश जारी गर्दै उनले नेपाली दिदीबहिनी तथा दाजुभाइले उत्साहपूर्वक आफ्नो लोकतान्त्रिक अधिकार प्रयोग गरेको देख्दा खुसी लागेको बताएका छन्। उनले यसलाई नेपालको लोकतान्त्रिक यात्राको महत्वपूर्ण र गौरवपूर्ण क्षणका रूपमा वर्णन गरेका छन्।

छिमेकी राष्ट्रका रूपमा भारत सधैं नेपालको स्थिरता, विकास र समृद्धिको पक्षमा रहेको पनि उनले उल्लेख गरेका छन्। साथै उनले भारत नेपालका जनता र आगामी दिनमा बन्ने नयाँ सरकारसँग सहकार्य गर्न सधैं प्रतिबद्ध रहेको बताएका छन्।

मोदीले आगामी कार्यकालमा दुई देशबीचको सम्बन्धलाई अझ मजबुत बनाउँदै साझा शान्ति, प्रगति र समृद्धिका लागि सहकार्यलाई नयाँ उचाइमा पुर्‍याउने विश्वास व्यक्त गरेका छन्।

नेपालमा नयाँ सरकार गठनको प्रक्रिया सुरु हुन लागेको सन्दर्भमा भारतीय प्रधानमन्त्रीको यो सन्देशलाई कूटनीतिक वृत्तमा महत्त्वका साथ हेरिएको छ। उनले नेपालको लोकतान्त्रिक प्रक्रियाप्रति भारतको समर्थन रहने र आगामी दिनमा दुई देशबीचको सहकार्य अझ सुदृढ हुने संकेत दिएका छन्।

भारतले नेपालको आर्थिक तथा सामाजिक विकासका प्रयासमा निरन्तर साथ दिने प्रतिबद्धता पनि मोदीले दोहोर्‍याएका छन्।