काठमाडौँ/झापा । प्रतिनिधिसभा सदस्य निर्वाचनको अवसरमा आज उच्च पदस्थ व्यक्तिहरूले आ–आफ्नो मतदान केन्द्रबाट मताधिकार प्रयोग गरेका छन्।

प्रधानमन्त्री सुशीला कार्कीले धापासी निमावि, फैमालचुली मतदान केन्द्रमा पुगेर मतदान गरेकी छन्। उनले मतदानपछि शान्तिपूर्ण र निष्पक्ष निर्वाचनको महत्व उल्लेख गर्दै जनतालाई मतदानमा सक्रिय रहन आग्रह गरेकी छन्।

साथै, कार्यवाहक प्रमुख निर्वाचन आयुक्त रामप्रसाद भण्डारीले बिहीवार बिहान काठमाडौं महानगरपालिका–२९ वडा कार्यालय मतदान केन्द्रबाट मतदान गरेका छन्। मतदानपछि सञ्चारकर्मीसँग संक्षिप्त कुरा गर्दै उनले भने, “स्वच्छ, निष्पक्ष र भयरहित वातावरणमा मतदान भइरहेको छ। सबै मतदातालाई मतदानमा सहभागी हुन आग्रह गर्दछौँ।”

भण्डारीले मतगणना प्रक्रियासम्बन्धी योजना समेत स्पष्ट पारे। उनले बताए– खसेको मतको आधारमा गणना टोली बनाएर छिटो मत परिणाम सार्वजनिक गरिनेछ र फागुन २५ भित्र प्रत्यक्ष र समानुपातिकतर्फको परिणाम सार्वजनिक गरिसक्ने आयोगको अठोट रहेको छ।

यसै निर्वाचनअन्तर्गत देशभर प्रत्यक्षतर्फ १६५ निर्वाचन क्षेत्र र समानुपातिकतर्फ ११० स्थानका लागि मतदान भइरहेको छ। मतदान कार्य बिहान ७ बजे सुरु भई साँझ ५ बजे सम्म जारी रहने आयोगले जनाएको छ।