रुकुमपश्चिम/बुटवल। प्रतिनिधिसभा सदस्य निर्वाचनअन्तर्गत विभिन्न दलका शीर्ष नेताहरूले आज बिहानै आ–आफ्नो मतदान केन्द्रबाट मताधिकार प्रयोग गरेका छन्।

प्रगतिशील लोकतान्त्रिक पार्टीका रुकुमपश्चिम उम्मेदवार जनार्दन शर्माले मुसिकोट नगरपालिका–५ स्थित शेरिगाउँ मतदान केन्द्रबाट मतदान गरेका छन्। पूर्वगृह तथा अर्थमन्त्रीसमेत रहेका शर्माले ‘क’ मतदान केन्द्रबाट पहिलो मतदाताका रूपमा मतदान गरेका हुन्।

मतदानपछि संक्षिप्त प्रतिक्रिया दिँदै उनले लोकतन्त्र सुदृढीकरणका लागि जनताको सहभागिता महत्वपूर्ण रहेको उल्लेख गर्दै आफू उत्साहित रहेको बताए।

यस्तै, नेकपा (एमाले) का उपाध्यक्ष विष्णुप्रसाद पौडेलले बुटवल–८ स्थित सडक विभागको मतदान केन्द्रबाट मतदान गरेका छन्। बिहानै मतदान केन्द्र पुगेका उनले आफ्नो मताधिकार प्रयोग गरेपछि निर्वाचनलाई लोकतन्त्रको उत्सवको संज्ञा दिए। उनले शान्तिपूर्ण र निष्पक्ष वातावरणमा मतदान सम्पन्न हुने विश्वास व्यक्त गरे।

बुटवल क्षेत्रमा सुरक्षा व्यवस्था कडा पारिएको छ। मतदान केन्द्र वरिपरि नेपाल प्रहरी, सशस्त्र प्रहरी बल र स्वयंसेवक परिचालन गरिएको छ।

देशभर आज बिहान ७ बजेदेखि मतदान सुरु भएको छ र साँझ ५ बजेसम्म जारी रहने निर्वाचन आयोगले जनाएको छ।