काठमाडौं, १५ फागुन । नेकपा (एमाले) का अध्यक्ष केपी शर्मा ओलीले चुनावमा हुने कुनै पनि प्रकारका धाँधली एमालेलाई मान्य नहुने बताएका छन् । निष्पक्ष र धाँधलीरहित रूपमा चुनाव सम्पन्न गराउन सरकार गम्भीर नदेखिएको ओलीको भनाइ छ ।

अनेरास्ववियुले दमकमा आयोजना गरेको ‘बासँग विद्यार्थी कार्यक्रममा उनले युवाहरूलाई विभिन्न माध्यमबाट फैलाइने भ्रममा नपर्न र त्यस्ता भ्रम चिर्न सक्रिय हुन आग्रह गरे ।ओलीले वर्तमान राजनीतिक संकट अन्त्यका लागि निर्वाचनमा जानुपरेको उल्लेख गर्दै देश संकटमा परेको अवस्थामा त्यसबाट मुक्ति दिलाउन एमाले चुनावमा केन्द्रित भएको बताए । एमाले चुनावबाट नभाग्ने बताउँदै देशभर पार्टी चुनावी तयारीमा जुटेको उनको भनाइ छ ।आगामी चुनावमा एमाले पहिलो शक्ति बन्ने दाबी गर्दै ओलीले देशमा देखिएका समस्याहरूको समाधान निकाल्ने प्रतिबद्धता व्यक्त गरे ।