सिन्धुली, ११ फागुन । सिन्धुलीको मरिण गाउँपालिका–४ साहान निर्माणाधीन हिमालयन फुड कम्पनीमा चिनियाँ र स्थानीय कामदारबीच झडप भएको छ । झडपमा पाँच जना चिनियाँसहित सात जना घाइते भएका छन् ।

जिल्ला प्रहरी कार्यालय सिन्धुलीका प्रमुख (एसपी) लालध्वज सुवेदीका अनुसार मरिण गाउँपालिका–६ धमिले बस्ने बर्ष ३० को नबराज बम्जनलाई कामबाट निकालेको बिषयलाई लिएर वादविवाद हुँदा दुबै पक्षबीच झडपको अवस्था आएको हो ।
मबार बिहान पौने ९ बजे झडप भएको हो । झडपमा मरिण गाउँपालिका–६ धमिले बस्ने बर्ष ३० को नवराज बम्जन घाइते भएका छन् । उनको दायाँ आँखामा र दायाँ खुट्टामा चोट लागेका कारण थप उपचारका लागि जिल्ला अस्पताल सिन्धुली रिफर गरिएको प्रहरीले जनाएको छ । यस्तै उदयपुरको कटारी नगरपालिका–१२ बस्ने बर्ष २२ को गोकर्ण कटुवाल पनि घाइते भएका छन् । उनको टाउकोमा चोट लागेको छ ।

झडपमा पाँच जना चिनियाँ कामदार घाइते भएका छन् । घाइते हुनेहरूमा चीन घर भई हाल हिमालयन फुड कम्पनीमा काम गर्ने बर्ष ३८ मिस्टर याङ कानमा, ४५ को याङ हाईबो, बर्ष ४० का छ्याङ छोङ, बर्ष ४६ को चुजेन र बर्ष ३१ को लेउसेन्सी रहेका छन् ।उनीहरू सबैको प्रायः टाउको र हातमा चोट लागेको छ । घाइते सबैको प्राथमिक स्वास्थ्य केन्द्र कपिलाकोटमा उपचार भईरहेको छ ।

घटना लगत्तै ईलाका प्रहरी कार्यालय कपिलाकोटबाट १० र निर्वाचन प्रहरी १५ गरी २५ जनाको सुरक्षा टोली परिचालन गरिएको छ । थप घटना हुन नदिन थप सुरक्षाकर्मी परिचालन गर्ने र घटनाका बारेमा अनुसन्धान थालिएको प्रहरी प्रमुख सुवेदीको भनाई छ ।